Një dron i prodhimit rus thuhet se ka spiunuar të paktën pesë herë zonën ku ndodhen ndërtesat e Qendrës së Përbashkët të Kërkimit të Komisionit Evropian në Ispra, në provincën e Veronës, në liqenin Maggiore.
Lajmi i publikuar nga “Corriere della sera” konfirmohet nga burime të informuara. Për rreth një javë, avioni i dyshimtë fluturoi mbi një nga objektet më të ruajtura në veri të Italisë.
Raporti erdhi nga Qendra e Përbashkët Evropiane e Kërkimeve, e cila përdori sistemin e saj të zbulimit eksperimental për avionë të panjohur. Vetëm në mars, kishte pesë kalime me dron që shkaktuan alarmin për sigurinë kombëtare.
Droni në fjalë, në fakt, shpesh është i pajisur me kamera dhe instrumente të afta për të filmuar një objektiv me rezolucion të shkëlqyer dhe madje edhe në dritë të ulët. Ai është gjithashtu i aftë për patrullime natën dhe harta tredimensionale.
Megjithatë, pas atyre fluturimeve të përsëritura, avioni i drejtuar nga distanca nuk u shfaq më kurrë dhe nuk la gjurmë.
Vëmendja është e lartë për këtë çështje. Aq sa u nisën menjëherë hetimet për të gjetur origjinën e dronit, kush e pilotoi dhe nëse mund të kishte qenë një mision zbulimi dhe spiunazhi.
