Kryetari i Bashkisë së Tiranës, Erion Veliaj dhe ambasadorja e Polonisë, Monika Zuchniak-Pazdan, përuruan palestrën e re të gjimnazit “Ismail Qemali”. Projekt ky u realizua nga Bashkia e Tiranës, me mbështetjen e Ambasadës së Polonisë në Tiranë.
“‘Ismail Qemali’ ka një ambient fantastik buzë të Lanës, në një nga bulevardet kryesore të Tiranës, me fushë tenisi, basketbolli, volejbolli, por në këto kohë të dimrit, sado që dimri ynë është relativisht i butë, ka nevojë edhe për një hapësirë sportive të brendshme. I jam shumë mirënjohës Ambasadës së Polonisë. Prej punës që kam, unë takoj shumë ambasadorë dhe diplomatë, ku pjesa më e madhe mbajnë fjalime, konferenca, seminare, etj. Por, ne e kemi kaluar atë fazë, tani na duhen miq që vërtet na japin një dorë. Kjo palestër mund të duket modeste sepse Tirana ka 400 institucione arsimore, por për ata që e bëjnë shkollën tek “Ismail Qemali”, ky është një investim shumë i rëndësishëm”, tha Veliaj.
Mandej, ai theksoi se në sport është shumë e rëndësishme që gjërat të bëhen në skuadër, ashtu sikur edhe në jetën e përditshme është mirë të kesh një mbështetje për të ecur përpara.
“Nuk është e thënë që të gjithë do të dalim sportistë elitarë, por ka rëndësi fakti që çunat dhe gocat luajnë në skuadër, mësojnë si të fitojnë e si të humbasin, sepse në jetë ashtu siç nuk mund të fitosh gjithmonë, edhe nuk humbet gjithmonë. Nga ana tjetër, gjërat bëhen në skuadër. Asnjë prej koshave që bëmë sot, nuk vinte dot nëse dikush tjetër nuk e pason topin, dikush nuk e mbron, edhe dikush tjetër nuk është pranë tabelës. Parimet që mësojmë nga sporti, janë parime që vlejnë për tërë jetën. Kush është marrë me sport tërë jetën, e di që një sportist i mirë, është mbi të gjitha një qytetar i mirë. Më vjen mirë që sot kultivojmë jo vetëm një ambient ku kalojmë kohë, por ku krijojmë skuadër, krijojmë komunitet, dhe krijojmë ndoshta disa miqësi, që do i kemi gjithë jetën, dhe nuk do t’i harrojmë kurrë”, u shpreh Veliaj.
Nga ana e saj, ambasadorja e Polonisë në Tiranë, Monika Zuchniak-Pazdan, falenderoi Bashkinë e Tiranës për punën e shkëlqyer që është bërë për realizimin e këtij projekti.
“Së pari, më lejoni të falënderoj përfaqësuesit e shkollës për mbështetjen dhe sigurisht ty, Erion, dhe skuadrën tënde, për gatishmërinë në realizimin e këtij projekti që prej fillimit. Të gjithë e dimë që vitin e kaluar Tirana ishte Kryeqyteti Europian i Sportit, me një kalendar të pasur me një sërë aktivitetesh dhe turnesh. Realisht keni bërë një punë të shkëlqyer. Ambasada e Republikës së Polonisë u angazhua në zbatimin e projektit, në rinovimin e këtij gjimnazi. Jam shumë e lumtur që ne e realizuam këtë në bazë të projektit polak të quajtur “Polish Aid”. Ky program tashmë na mundëson mbështetjen e disa projekteve, jo vetëm në Tiranë, por edhe në Kamëz. Shpresojmë që ky gjimnaz t’ju shërbejë për vite”, u shpreh ajo.
