Përurohen tre segmentet e para të Unazës së Vogël në kryeqytet. Kryebashkiaku Erion Veliaj theksoi se ky projekt ka respektuar hapësirat për të gjithë, duke krijuar një lloj balance për makinat dhe njerëzit.
Duke theksuar se brenda muajit qershor do të nisin punimet për sheshin “Skënderbej”, zoti Veliaj kërkoi mirëkuptimin e qytetarëve, për vështirësitë që do të hasin në qarkullimin rrugor, gjatë 12 muajve që do të kryen punime në shesh.
“Kemi bërë gjysmën e Tiranës, kemi dhe gjysmën e njësive të Tiranës me konsultat publike. Brenda muajit qershor do të fillojmë punën në sheshin “Skënderbej”. Do punojmë segmente segmente, sheshi nuk do të bllokohet. Nuk rezultoi ndonjë dramë të madhe për qytetin, trafiku gjatë punimeve për Unazën. Mirëkuptimi të na karakterizojë edhe gjatë 12 muaj punime në sheshin “Skënderbej”. Sikur të gjithë të tregojmë pak mirëkuptim, ne do të ecim shumë shpejt.”- u shpreh Veliaj.
Gjithashtu, kryebashkiaku bëri të ditur se brenda muajit maj do të shembet godina e INSIG-ut, pronarët e së cilës, sipas tij, kanë marrë një kompensim mjaft bujar, rreth 2 milionë dollarë.
“Nuk mund të shembet me dinamit sepse ndodhet në një zonë të banuar. Brenda majit besoj se kemi mbaruar me prishjen. Janë liruar 14 hapësira që ziheshin nga shtëpi. Ka kaluar dhe fondi i kompensimit. Vetëm ndërtesa e INSIG-ut është vlerësuar me rreth 2 milionë dollarë. Për takatin që ka shteti shqiptar dhe qyteti i Tiranës, unë besoj se kanë marrë një kompensim bujar”, deklaroi Veliaj.
Ndërkohë, duke filluar nga kjo javë, autobusët e Kosovës dhe disa nga autobusët e Greqisë do të transferohen tek pallati i sportit “Partizani”. Ndërsa autobusët që qëndronin përpara muzeut do të kenë stacionin e tyre prapa Muzeut Historik Kombëtar.
