Javanews/ Historia përsëritet në forma të ngjashme por jo përherë me të njëjtët aktorë apo me të njëjtat rezultate. Në asamblenë Kombëtare të PS-së Edi Rama foli për një referendum brenda selizë rozë në lidhje me mundësinë për zgjedhje apo vijim të mandatit të tij në krye të partisë.
14 vite më parë ishte Fatos Nano, kryetari i asaj kohe i PS-së, i cili kërkonte të bëhej një referendum brenda selizë rozë. Në përplasje të hapur me kryeministrin e asaj kohe, Ilir Metën, Nano përdori kartën e referendumit për të larguar nga Partia Socialiste mbështetësit e Metës si dhe për të forcuar edhe më shumë pozitat e tij në krye të PSSH. Në ato vite, Kryeministri Meta kishte qenë i prerë në vendimin për të mos propozuar si kandidat për President Fatos Nanon, një dëshirë kjo të cilën Nano nuk e materializoi asnjëherë.
Por edhe pse karta e referendumit është përdorur në të dyja rastet për të qëllime politike, në vitin 2002, Fatos Nano propozonte një sërë çështjesh për tu vendosur me referendum nga anëtarët e PS-së, të cilat ishin:
-Zgjedhja e kryetarit nga anëtarësia dhe rikompozimi i forumeve mbi bazën e votave të dala nga votimi i referendumit.
-Papajtueshmëria e dy mandateve si Kryeministër dhe Kryetar Partie
-Kryetari i PS propozon kanditatët për Kryeministër dhe Kryetar Parlamenti
-Kandidati i mazhorancës për President të zgjidhet nga anëtarësia
Prej mëse një muaji akuzat dhe kundërakuzat mes Metës dhe Nanos e kishin tensionuar situatën brenda selisë dhe qeverisjes së majtë të asaj kohe. Referendumi e bëri “punën” e tij pas takimit të 15 janarit mes Metës e Nanos, cka solli edhe një qetësi mes dy figurave kryesore të PS në atë mot. Fitues doli Kryetari i partisë Nano, i cili kishte ngulmuar për një rikompozim të qeverisë Meta. Paqja mes palëve zgjati disa muaj, kur në vitin 2003 Ilir Meta dha dorëheqjen nga posti kryeministrit, teksa beteja mes të dyve vijoi deri në dhjetor të po të njëjtit vit. Në atë periudhë u mbajt kongresi rradhës, ku kryetar i Partisë Socialiste u zgjodh sërish Fatos Nano ndërsa Ilir Meta dhe mbështetësit e tij nuk u zgjodhën në forumet e larta drejtuese të PS-së. Referendumi nuk u bë. Më pas historia është e njohur. Në vitin 2004 lind Lëvizja Socialiste për Integrim.
