Një grup i aktivistëve që protestuan këtë të dielë kundër parkut të lojërave tek Liqeni Artificial kanë patur një takim me Kryeprokurorin Adriatik Llalla. Ambientalisti Sazan Guri tha se i kanë kërkuar Lallës që të hetojnë veprimet e policisë.
“Policia në përgjithësi mbajti qëndrim korrekt por ishin disa segmente që kanë bërë ndërhyrje brutale, në këto kushte mendojmë që duhet të kemi një komunikim me prokurorinë se janë 10-15 projekte që rëndojnë në atë zonë, ne nuk jemi kundër projekteve por themi që ato të bëhen në vendin e duhur, përshembull nën digë, sic janë shumë parqe të tjera. Këtu ka vend për vepra të rënda penale. Janë prerë 15 pemë në mënyrë të paligjshme, që konsidetohet vepër penale. Prokuroria që sot ka hapur proces penal. Morëm garanci nga Llalla se do vijojnë procedimet”,- tha Guri.
Ndërsa aktivisti Zirkon Disha u shpreh:
“I kërkova kryeprokurorit të marrë në vlerësim të gjitha videot e xhiruara, kjo s’është dhunë që ka qenë për herë të parë, vazhdimisht dhunohen protestuesit”.
