Dashamir Shehi, kryetari i Lëvizjes për Zhvillim Kombëtar (LZHK), i ftuar në emisionin “Ekspres” në RTSH, e konsideron historike që diaspora shqiptare do të ketë mundësinë të marrë pjesë në zgjedhjet e sivjetme parlamentare, më 11 maj.
Megjithatë deputeti opozitar e quajti të rrezikshme atë që po ndodh me partitë politike, që “i janë turrur votave të diasporës” dhe po i përçajnë emigrantët, duke e çuar debatin politik nga Tirana nëpër botë.
“Unë mendoj se ne bëmë ligjin që ata njerëz të votojnë të lirë atje. Të votojnë se ata janë më të emancipuar nga ne dhe më të çliruar nga frika, sepse nuk punojnë e bëjnë biznes në Shqipëri,” u shpreh ai me gazetarin Nolian Lole.
“Propagandë partish në diasporë nuk duhet të ketë.”
Duke komentuar votën e diasporës, Shehi tha se partitë e mëdha po e shohin këtë gjë si një “thes elektoral ku mund të shtrijnë dorën e të rrëmbejnë sa më shumë”. “Për mua,” shtoi Shehi, “po i bëhet një dëm i madhe diasporës, por dhe demokracisë.”
“Tani kush ka mundësi financiare apo dhe mjete të tjera janë turrur nëpër botë, ku e ku të rrëmbejnë vota. Kjo përplasje politike që kemi ne këtu po ia çojmë edhe atyre jashtë, sepse ata nuk kanë pasur fare interes politik, por tani me këtë trysni po ia çojmë dhe atyre andej duke i përçarë. Politika këtu po çon të njëjtin mentalitet përçarës.”
Sipas Shehit, kjo që po ndodh sot duke i kërkuar votën diasporës është një zgjatim i politikës sonë këtu në Shqipëri.
