Ditët e fundit ka shpërthyer një sherr i madh mes konspiracionistëve të protestës, e cila po shpërfaqet dita-ditës në postime në rrjetet sociale. Akuzat janë të ndryshme, duke filluar që nga përfitime fondesh të majme nga OJF, lidhje me Soros-in dhe deri te pagesat si mercenarë oligarkësh.
Përplasja është bërë më e ethshme nga konspiracionisti Alfred Çako, i cili me një valë postimesh ka zbuluar se drejtuesit e protestës kanë gllabëruar fonde nga organizata të huaja.
“Siç ju thashë dje, do fillojmë të hedhim gjithë OJF-istët që kanë gllabëruar fonde nga organizatat e huaja e dalin cicërrijnë atje tek mikrofoni si patriotë të mëdhenj. Me radhe do japim dhe të tjera.
Sot me Sidorela Vatnikaj që e thërresin me statusin e soroistes dhe globalistes në OKB!
Kjo është gjak i afërt me G. Prognin dhe gruaja e Edisonit që kakarris tek mikrofoni. Edhe ky është një OJF-ist i thekur.
Ca nga ca”, thotë Çako.
Nga ana tjetër, Kastriot Çipi shprehet se grupi organizator i protestës ka marrë vendim për t’u hequr të drejtën e fjalës kujtdo që bën thirrje për krijimin e partive politike, ndërkohë që nuk shfaqen me fytyrë.
“Grupi koordinator i mikrofonit të protestës, ka vendosur që t’u heqë të drejtën e fjalës citoj: “Personave që bëjnë thirrje për krijimin ose organizimin e partive politike, organizatave politike, në dhe nga kjo protestë”.
Po u drejtohem personalisht atyre, që i njoh si anëtarë të atij grupi: Andi Tepelena, Al-Ben Guide Kola, Dritan Goxhaj dhe Gent Progni.
Pyetja është: Cilët janë ata, që kanë votuar për këtë vendim? Publiku duhet t’i dijë të gjithë, një për një, me emër e fytyrë. Kur merr vendime në emër të protestës, duhet të vesh emrin dhe fytyrën tënde në lojë, përndryshe po bën lojë të pistë.
Alibia e atyre, që fshehin emrin dhe fytyrën, se gjoja u druhen pasojave nga hakmarrja e qeverisë, është aq e trashë, sa do të vinte në dyshim inteligjencën e kujtdo, që do të thoshte se e beson. Qeveria di çdo lëvizje, që bëni dhe çdo fjalë, që nxirrni, nga goja apo celulari juaj. Edhe nëse në mes jush do të ishte ndonjë frikacak/e i/e sinqertë, prania e tij/saj në të njëjtin grup, do të ishte fyerje për sakrificën tuaj.
Publikoni listën e plotë emërore! Jam shumë kureshtar të di, sa prej tyre kanë marrë bursa, grante projektesh apo rroga nga fondacionet e Sorosit në 5 vitet e fundit!
Aktivizmi nuk bëhet me rrogë, por me sakrifica! “Aktivistët” e paguar nuk janë aktivistë qytetarë, por mercenarë oligarkësh, vendas apo të huaj”, shkruan Çipi.
