Ministri i Jashtëm i Holandës ka bërë thirrje ndaj Komisionit Europian që të përgatitet për përdorimin e “Statutit të Bllokimit”, me qëllim mbrojtjen e gjyqtarëve dhe zyrtarëve të Gjykatës Penale Ndërkombëtare (GJNP), nëse Donald Trump zbaton kërcënimin e tij për të vendosur sanksione të paprecedenta ndaj kësaj gjykate.
GJNP-ja ka selinë në Hagë, në Holandë.
“Do të bëjmë gjithçka që mundemi për të mbrojtur GJNP-në”, tha ministri holandez. Ai shtoi se Holanda i ka kërkuar Komisionit Europian që të ketë gati “Statutin e Bllokimit”, në mënyrë që ky mekanizëm të përdoret nëse është e nevojshme.
Deri tani, Komisioni Europian, i drejtuar nga Ursula von der Leyen, ka refuzuar ta aktivizojë këtë mekanizëm për të neutralizuar sanksionet e SHBA-ve ndaj gjyqtarëve dhe zyrtarëve të GJNP-së, pavarësisht kërkesave nga Sllovenia dhe Spanja.
Mes personave të prekur nga sanksionet janë edhe dy gjyqtarë nga vende të BE-së: sllovenia Beti Hohler dhe francezi Nicolas Guillou.
“Statuti i Bllokimit” është një mekanizëm ligjor i BE-së që synon të mbrojë kompanitë dhe qytetarët evropianë nga efektet e sanksioneve të vendosura nga vende jashtë BE-së.
Ai u jep mbrojtje ligjore subjekteve evropiane dhe, në rrethana të caktuara, ndalon kompanitë e BE-së të zbatojnë këto sanksione.
