Lejet e mjedisit kanë sjellë përplasjen e radhës mes qeverisë dhe bashkiakëve. Janë 5500 subjekte që me ligjin aktual duhet të marrin licencën e posaçme, por Ministria e Mjedisit propozon që leja ti kalojë ekzekutivit përmes dy lejeve të tjera mjedisore.
“Ne mendojmë që ata që duhet të kenë leje mjedisore janë ato subjekte që realisht dëmtojnë ose kanë pritshmëri që mund të dëmtojnë mjedisin. Për këtë kemi leje të tipit A dhe B, të cilat nuk mund të jenë pjesë e një sistemi tjetër përveç sistemit të mjedisit. Ajo që ne kundërshtojmë në kërkesën e bashkive për të marrë ata lejen e tipit C është mosdakordësia në radhë të parë që të vazhdojë të ekzistojë një leje e tepërt në numër kaq të madh subjektesh”, tha Klosi.
Për të shmangur abuzimet në administratë, kreu i Mjedisit deklaroi se duke filluar nga viti i ardhshëm të gjitha lejet mjedisore do të jepen online.
“Sa më pak kontakt i drejtëpërdrejtë i administratës me biznesin do ta lehtësojë raportin e biznesit karshi lejet mjedisore. Masa e parë që kemi paraqitur në ndryshimin e vendimit të Këshillit të Ministrave është bërja online e të gjitha lejeve mjedisore”, deklaroi ministri gjatë raportit në Komisioni për Veprimtarinë Prodhuese, Tregtinë dhe Mjedis.
Një tjetër propozim ishte dhe heqja nga qarkullimi i qeseve plastike. Ky projekt do të nisë zbatimin në vitin 2020.
g.kosovari
