Prokuroria e Posaçme Kundër Korrupsionit ka marrë të pandehur tre persona, të cilët akuzohen se kanë planifikuar dhe tentuar vrasjen e Aleksandër Prendit dhe familjes së tij në fshatin Rranxë të Vaut të Dejës.
Ngjarja e rëndë ka ndodhur në 2024, ku Izmir Sakicen, Samuel Troshanin dhe Franko Leken pasi kanë organizuar atentatin kanë shkuar drejt fshatit Rranxë ku ishte edhe Prendi për eliminimin e tij, por janë hasur me plumbat e tij.
Pas zbardhjes së ngjarjes, SPAK ka marr të pandehur 3 autorët, të cilët akuzohen për “vrasje në rrethana cilësuese e mbetur në tentativë”, “sigurimi i kushteve për kryerjen e vrasjes”, “armëmbajtje pa leje”, të gjitha këto të kryera në kuadër të grupit kriminal.
Gjithashtu SPAK ka ngritur akuza edhe ndaj Aleksandër Prendit, i cili qëlloi me armë në drejtim të atentatorëve, duke e akuzuar për “vrasje në tentativë”.
Franko Leka dhe Aleksander Prendi vijojnë të jenë ende në kërkim nga autoritete, të cilët nuk janë gjetur edhe pas kontrolleve të shumta të zhvilluara në zona të ndryshme. Për këtë ngjarje në burg janë vetëm Izmir Sakica dhe Samuel Troshani, të cilët u vetëdorëzuan në polici pas ngjarjes.
Si ndodhi ngjarja
Sipas SPAK, Izmir Sakica, Samuel Troshani dhe Franko Leka bashkë me persona të tjerë të paidentifikuar janë nisur të organizuar me mjete të blinduara në drejtim të fshatit Rranxë, në Njësinë Administrative Bushat, Bashkia Vau i Dejës.
Personat kanë qenë të armatosur me qëllim vrasjen e Aleksander Prendin dhe familjarëve të tij, që janë banorë të kësaj zonë.
Në kohën që ata kanë qenë duke kaluar në këtë zone, janë qëlluar me armë zjarri nga Prendi. Nga provat e siguruara në vendin e ngjarjes rezulton të ketë pasur shkëmbim zjarri, jo dëmtime të shëndetit të personave të përfshirë, por vetëm të mjeteve.
Njëri nga mjetet me të cilën kanë lëvizur personat nën hetim, është dëmtuar si pasojë e të shtënave në vendin e ngjarjes. Ai ka rezultuar i paregjistruar, me pronësi të panjohur dhe me targa të huaja, të cilat nuk i përkojnë po të njëjtit mjet.
