Dalin detaje të reja lidhur me aksidentin e ndodhur rreth orës 04.00 të mëngjesit të kësaj të hëne, në kryqëzimin e quajtur “Kolagji”, lagja nr.2, Sarandë.
Një ambulancë e spitalit të Sarandës me drejtues 54-vjeçarin Aleko Kajo, banues në Sarandë u përplas me mjetin tip “BMW X5”, të drejtuar nga 24-vjeçari Kosta Kaca, 24 vjeç, banues në Sarandë.
Për pasojë mbetën të plagosur dy drejtuesit e mjeteve, si dhe infermierja që ndodhej në ambulancë Adelina Rizvani, 58 vjeçe.
Mësohet se ambulanca me infermieren, po ktheheshin për në shtëpi, pasi gruaja ishte njoftuar për të asistuar në një lindje.
Por përplasja rezultoi me pasoja të rënda për gruan, e cila u dërgua me helikopter drejt spitalit të Traumës në Tiranë, ku po lufton mes jetës dhe vdekjes.
Dy drejtuesit e mjeteve pësuan lëndime të lehta, ndërkohë që policia vijon hetimet për zbardhjen e rrethanave të ngjarjes.
/a.r
