Arrest me burg për taksistin që përplasi për vdekje në trotuar një kalimtar 66-vjeçar pak ditë më parë.
Pas aksidentit tragjik në plazhin e Durrësit, ku humbi jetën një 66-vjeçar, gjykata vendosi që taksisti 26-vjeçar Aldi Talelli të qëndrojë në paraburgim deri në përfundim të hetimeve.
Gjykata e Durrësit ka caktuar masën e sigurisë “arrest në burg”, ndërsa ka vleftësuar të ligjshëm edhe arrestimin e tij në flagrancë.
26-vjeçari Talelli po hetohet për veprën penale “shkelja e rregullave të qarkullimit rrugor”, pasi dyshohet se ishte drejtuesi i automjetit që u përfshi në aksidentin me pasojë vdekjen e 66-vjeçarit Fezi Dine i cili po ecte qetësisht në trotuar.
Vendimi i gjykatës e mban Talellin në paraburgim, ndërsa hetimet do të vijojnë për të zbardhur rrethanat e plota të aksidentit. Nga hetimet paraprake rezulton se aksidenti ndodhi nga pakujdesia e taksistit.
Ai akuzohet për veprën penale parashikuar nga neni 290/3 i Kodit Penal.
Kur shkelja e rregullave të qarkullimit rrugor shkakton vdekjen e një personi, Kodi Penal parashikon dënim nga dy deri në dhjetë vjet burgim.
