Ish-ministri i Bujqësisë, Edmond Panariti i përgjigjet deputetit të PD-së, Myslim Murrizi në lidhje me letrat që ambasadori amerikan Donald Lu u ka dërguar pjesëtarëve të kabinetit “Rama 1”.
Panariti shkruan se ambasadori Lu është në të drejtën e vet të vlerësojë punën e gjithësecilit.
“Korrigjo shënjestrën Z. Murrizi dhe opozitarizmin tënd mos e konsumo ndaj ambasadorit të nderuar të Shteteve të Bashkuara të Amerikës, i cili është plotësisht në të drejtën e tij të shprehet, gjykojë, vlerësojë dhe falënderojë ose jo personalitete dhe institucione, duke shprehur jo thjesht qëndrimin e tij personal, por atë të Shteteve të Bashkuara.
Meqenëse e kishe merak dhe e ftoje ambasadorin të falënderojë edhe ministrat e LSI-së, të njoftoj që, ai e ka bërë atë dhe letra e falënderimit dhe e vlerësimit ndodhet mbi tryezën time, por duke e konsideruar atë diskrete dhe personale, nuk e shoh të udhës ta bej publike”, shkruan Panariti.
Deputeti demokrat Myslim Murrizi e cilësoi si të gabuar faktin që ambasadori Lu u ka dërguar letër ministrave të kabinetit “Rama 1”.
