Një grua që ishte duke kaluar rrugën me fëmijën në krah u përplas nga një makinë tip ‘Mazda’ pasditen e sotme në zonën e Skelës në qytetin bregdetar. Fëmija ka shpëtuar për mrekulli, ndërsa nëna është transportuar në spital e plagosur.
Gazetari i Report Tv, Armand Xhelili raporton se në momentin që makina ka përplasur gruan dhe fëmija ra në asfalt ndërhyri një qytetar duke e kapur me shpejtësi, pasi përballë po vinin makinat.
Report Tv sjell pamjet nga vendi i ngjarjes, teksa duket efektivi i policisë rrugore duke mbajtur në krah fëmijën që fatmirësisht është në gjendje të mirë shëndetësore. Ndërkohë nëna e tij ndodhet në spital nën kujdesin e mjekëve.
Policia ka ndaluar drejtuesin e makinës luksoze dhe po vijon hetimet. Po sot në aksin Elbasan-Peqin u shënua një aksident tjetër me dy të plagosur pas përplasjes së një kamioni me një makinë. Ndërkohë që dje u plagosën nëntë persona nga tre aksidente.
