Nga Artur Ajazi
Kryetari PD, ka mbledhur dje në mesditë “me urgjencë” grupin e tij parlamentar, megjithëse të pranishëm ishin vetëm gjysma e deputetëve të listës tij. Sapo lexova lajmin sinqerisht isha në pritje të ndonjë vendimi të rëndësishëm nga kreu PD, pasi gjysëmgrupin e tij parlamentar e ka mbledhur jo si zakonisht në selinë e partisë dje, por në Kryesinë e Kuvendit. Megjithëse isha i bindur se nuk do të dëgjoja ndonjë gjë të re dhe të rëndësishme nga deklarata e tij për shtyp, sërish vendosa të qëndroj deri në fund, deri sa Luli doli prej andej dhe ju drejtua kamerave dhe mikrofonëve.
Dhe nuk kishte se si të ndodhte ndryshe, pasi Luli foli dhe nuk tha asgjë, pasi thjesht edhe kësaj here, ai ishte përpjekur të aftësohej për tu bërë lider i partisë tij. Ai ishte përpjekur dhe do të vazhdojë të përpiqet të deklarohet si lider, por jo ama duke mbledhur gjysmën e grupit parlamentar, dhe jo duke ripërsëritur rëndom deklarata të cilat i bën sa tek selia e PD ashtu edhe tek foltorja e parlamentit.
Lulzimi foli edhe dje për “krimin, për qeverinë e korruptuar, për arratisjen e tre oficerave të policisë Vlorë, për largimin e Ramës si kryeministër, për trafikun”, dhe sërish duke u rikthyer tek refreni deklaratave para kamerave duke përfunduar me shprehjen “zgjidhja është largimi i Ramës”. Mendo tani një kryetar partie kryesore të opozitës të dalë para kamerave çdo tre-tre ditë, i shoqëruar nga dy-tre deputetë pa peshë, tek deklaron dhe flet për gjëra që vetëm me “aksionin opozitar” nuk kanë lidhje.
Pse kjo është opozita e Partisë Demokratike, pse kjo është forca e dytë politike e vendit, (siç pretendon ai) deri këtu është katandisur kjo parti sa të merret me arrestimin ose mosarrestimin e dy-tre oficerave të policisë, duke ditur se vendi dhe shqiptarët kanë sot halle dhe probleme më madhore për të diskutuar ? Si mundet një kryetar partie që pretendon se “është lideri opozitës” të dalë para kamerave me të njëjtin refren të mërzitshëm duke mos thënë asgjë që do tu interesonte shqiptarëve, anëtarëve dhe militantëve të PD ?
Pse kaq paaftësi, dhe pse kaq shterpësi mendimesh dhe idesh, nga një njeri i shkolluar, me një rreth të gjërë njohjesh në fushën e politikës tashmë, si mundet ta gënjesh vehten duke shpresuar se po gënjen edhe shqiptarët, apo më keq akoma anëtarësinë dhe ata që të kanë votuar ? Kjo mënyrë dhe kjo rrugë e të bërit opozitë, thjesht po degradon në kufijtë e mjerimit një parti, e cila ka qenë dhe është një vlerë kombëtare Lulzim.
Dy ditë më parë kreu Partisë Republikane Fatmir Mediu në një intervistë televizive, paksa i indinjuar tha se “opozita duhej të ishte në sheshe”, duke nënkuptuar faktin se “pse Basha ka zgjedhur të bëjë opozitë me deklarata dhe lojëra fjalësh”. Por e vërteta e opozitës së Lulit është tjetër gjë, ashtu si dhe deklaratat dhe tentativa për ti bërë sa më interesante njoftimet për shtyp, duke përhapur lajmin se “diçka do të ndodhë tani”. Kjo që Luli po bën me Partinë Demokratike dhe gjysëmgrupin e tij parlamentar, të ngjet me “praktikën dhe guidën” e kursantit për shofer. Edhe ai, është në fazën e të bërit teori dhe praktikë me fatin e Partisë Demokratike.
Këtë gjë, Luli ka vite që e ka bërë dhe po e bën, madje me sukses të madh. Pasi hapi çadrën, pasi takoi kryeministrin Rama , pasi firmosi siç deshi ai, pasi mbylli çadrën duke zhgënjyer ata qyqarë që e besuan për 90 ditë, pasi humbi zgjedhjet, dhe pasi rrëmbeu “fitoren” si kryetar partie, Lulzimi tani është në fazën tjetër, të guidës (praktikës) për tu bërë “timonieri” i PD. Deri këtu ka katandisur kjo parti, e cila për hir të së vërtetës duhet thënë se, nuk ka qenë në këtë situatë as në 1997, apo edhe kur Berisha vendosi të largohej përfundimisht si kryetari historik i saj.
Deri në 2021, gjithsesi është një kohë e gjatë dhe ndoshta e pamjaftueshme për Lulzimin për tu aftësuar plotësisht si lider opozite, por një kohë e humbur për PD, e cila po humbet çdo ditë gjithçka të bukur dhe me vlerë që kishte.
