Një hile e trashë me qëllim për të ekslipsuar hapjen e negociatave të Shqipërisë me BE. Kështu mund të konsiderohet nisma, në dukje shqetësuese, por një lëvizje tipike tinzare, ajo e kreut të shtetit, i cili ka vendosur të thërrasë Këshillin e Sigurisë kombëtare për problemin e kanabisit. Kreu i shtetit, jo pa qëllim “i fryu” për ditë me rradhë tematikës së këtij takimi përpara mbledhjes së PE, që ndezi dritën e gjelbër për hapjen e negociatave, duke qenë në të njëjtën linjë me PD që kërkonte të mos hapeshin negociatat pasi Shqipëria, sipas saj, nuk e meriton për shkak të kanabisit. Lëvizjet e Nishanit pa asnjë finesë e në përputhje të plotë me vijën politike të PD, nuk përbëjnë ndonjë risi. Por ajo që të çudit është fakti i zellit të tij për të bërë pis ku të mundet ndaj kundërshtarëve politikë, duke mos u ngritur për asnjë cast gjatë këtyre 3 viteve në nivelin e kryetarit të shtetit, por thjeshtë mbeti në nivelin e një ushtari të ish kryeministrit të tij.
Qartazi duket se kreu i shtetit e ka thirrur këtë mbledhje pa asnjë konsultim, duke “harruar” se Shqipëria është republikë parlamentare dhe jo presidenmciale, ndonëse atij mund ti duket se “me ti rënë ai bilbilit” “toga” do mblidhet. Kryeministri Rama nuk do të marrë pjesë në këtë mbledhje. Ai në mesditën e kësaj të enjte u nis drejt Shteteve të Bashkuara të Amerikës, pasi do të marrë pjesë në aktivitetin e organizuar në 11 nëntor nga galeria njujorkeze “Mariana Goodman e cila do të ekspozojë pikturat e tij. Gjatë eventit të organizuar nga ambasada amerikane në kuadër të zgjedhjeve presidenciale, presidenti Bujar Nishani pohoi se nuk ishte venë në dijeni për mungesën e Ramës. Kreu i Komisionit të sigurisë Spartak Braho konfirmon pjesëmarrjen e tij dhe të kreut të Kuvendit, Meta. Këshilli i sigurisë do të mblidhet nesër në orën 18:00. Burime nga presidenca konfirmojnë se krahas Nishanit, do të raportojnë Ministri i Brendshëm, Drejtori i Shërbimit Informativ Shtetëror, ai i policisë së shtetit dhe Prokurori i Përgjithshëm. Në këshillin e sigurisë do të jenë dhe ministrat e Mbrojtjes, Jashtëm , Financave dhe Transporteve. Ende nuk dihet nëse këtë herë kreu i shtetit do të ftojë dhe liderin e opozitës, si nëntorin e kaluar në kuadër të sulmeve terroriste. Gjithësesi ai e bën vetë këtë edhe pa thirrur Bashën.
Armando Meta
