Pak orë përpara se Presidenti Ilir Meta të zhvillonte një takim me ambasadoren greke në Tiranë, mësohet se ai ka zhvilluar një takim me shefin e diplomacisë shqiptare Ditmir Bushati. Situata e krijuar në raportet mes Presidencës dhe Ministrisë së Jashtme, në lidhje me dhënien nga kreu i shtetit i autorizimit për formailizimin zyrtarë të negociatave për kufirin detar, si dhe një numër çështjesh të tjera, duket se vijon të jetë e nderë, pasi Meta jo vetëm nuk e jep autorizmin, por ai gjithnjë e më shumë nxjerr kushte pas kushtesh duke e bërë thuajse të pamundur marrjen e këtij autorizimi. Një situatë e tillë jo vetëm ka bllokuar negociatat, por nga ana tjetër ka krijuar dhe jo pak tensione dhe replika mes Presidencës dhe Ministrisë së Jashtme.
Takimi i zhvilluar në orët e para të mëngjesit mes Metës dhe Bushatit mësohet se nuk ka zgjatur shumë. Biseda e Bushatit dhe Metës është përqëndruar te letër-këmbimet për plotfuqishmërinë lidhur me nisjen e negociatave për një marrëveshje ndërkombëtare mes Shqipërisë dhe Greqisë. Të dyja palët kanë sqaruar pozicionet përkatëse, por ende nuk ka një rezultat konkret.
Disa ditë më parë Meta tha se kishte kërkuar sqarime të mëtejshme nga MEPJ, kërkesa këto që kanë shtuar dyshimet se kreu i shtetit ende nuk është i gatshëm që të hedhë një hap drejt dhënies së autorizmit. Besohet gjerësisht se edhe sikur Bushati t’i japë përgjigje shterruese të gjithë kërkesave që ka Meta, sërish do të ketë kërkesa të mbi kërkesa nga ana e Presidencës. Meta synon të jetë aktor në tryezë në këtë proces. Ky duket se është thelbi i mbajtjes pezull të autorizimit. javanews.al
Përpara takimit me ambasadoren greke, Meta takon Bushatin
