Përmirësohet situata e zjarreve në vend. Ministria e Mbrojtjes bëri të ditur se janë shuar një pjesë e madhe e vatrave të identifikuara në 24 orët e fundit, ndërsa vijojnë të jenë aktive dhe disa vatra të tjera.
Kështu në qarkun e Korçës ka një vatër aktive zjarri, në fshatin Arrëz, të bashkisë Devoll. Puna vijon edhe në malin Stilos në Konispol dhe fshatin Grazhdan të Finiqit.
Forcat e ushtrisë bënë të mundur shuarjen e zjarreve në Delvinë, Tepelenë, Lushnje, Elbasan dhe Berat. Ndërsa në fshatin Jarua të Fierit zjarri është shuar dhe po bëhet kontrolli i zonës.
Për këtë rast u vu në pranga një 42-vjeçar që ndezi zjarrin për të djegur barishtet në tokën e tij, por flakët dolën nga kontrolli duke shkrumbuar 20 hektarë me bimësi, 2 hektarë vreshta dhe 400 rrënjë ullinj.
Me të shkon në 23 numri i arrestuarve për veprën penale të shkatërrimit të pronës përmes zjarrit.
Lidhur me këtë rast reagoi edhe ministri i Brendshëm Taulant Balla i cili tha se do t’i ndjekë personalisht të gjitha çështje penale në procedurat gjyqësore për ndëshkimin e autorëve të zjarrvënies. Kodi Penal parashikon për këtë vepër penale një dënim deri në 15 vite burg.
/a.r
