Kryetari i Bashkisë së Kryeqytetit Erjon Veliaj ka bërë një panoramë të plotë të kushteve në të cilat ndodhet Tirana të dielën e përmbytjeve. Veliaj vuri theksin se përtej faktit se forca e natyrës nuk mund të kontrollohet, ajo që është për tu diskutuar janë ndërtimet pa leje pranë kolektorëve si dhe banesat pranë lumenjve. Në një prononcim telefonik në News 24, Veliaj tha se në mënyrë të papërgjegjshme zyrtarët e administratës së shkuar të Bashkisë kanë legalizuar banesat që ishin ndërtuar pranë kolektorëve të ujit si dhe në afërsi të lumenjve, që sipas Veliajt janë gërryer pa masë në kushte paligjshmërie. Në lidhje me zgjidhjen e situatës Veliaj tha se këto ndërtime do të shkatërrohen dhe se personat që jetojnë në këto ambiente do tu gjendet një banesë ose do të shpronësohen.
“Në 4 vite në Tiranë nuk u bënë investime në kolektor. Të djathtët s’dinë të punojnë, por s’dinë as të heshtin. Ne po punojmë çdo ditë, dhe jemi prezent kudo ku qytetarët kanë nevojë. Në dallim nga qytetet e tjera, Tirana e ka përballuar këtë gjendje pa situata tragjike.
Shtëpi në shtretër lumenjsh, apo mbi kolektor nuk do lejohen, do t’u japim banesa sociale. Janë rreth 12 zona problematike në Tiranë ku do të prishen ndërtimet pa leje. Te zona e Shqiponjës, mbi tre–katër shtëpi janë ndërtuar mbi kolektor. Këto banesa janë legalizuar, e tashmë do t’i duhen qytetarëve të Tiranës të paguajnë dëmshpërblimin për këtë gjë që e kanë lejuar dy-tre persona”, u shpreh Veliaj.
Veliaj gjithashtu, në komunikimin e tij telefonik shtoi se në Kryeqytet janë hequr nga kanalizimet një sasi mjaft e madhe plehërash plastike, disa ton prej tyre.
Kreu i Bashkisë tha se situata më problematike është në Zall Bastar, ku është dëmtuar këmba e urës që ndodhet atje e cila është duke u riparuar.
“Në Tiranë fatmirësisht kaloi pa situata tragjike. Të gjitha akset në terren janë të kalueshme. Për momentin më e keqja ka kaluar, po punojmë në aksin Zallbastar. Kam qenë gjithë ditën në terren, Ndroq, Kombinat. Në Laprakë uji është tërhequr, dhe situata paraqitet normale.