Prej rreth 20 ditësh një pjesë e territorit të Shkodrës ndodhet në gjendje shumë të vështirë nga përmbytjet. Mijëra hektarë tokë dhe qindra familje janë përmbytur, ndërsa bashkia Shkodër vijon që të kërkojë shpalljen e emergjencës, por është refuzuar nga qeveria.
Në këto kushte, Arben Ceni që është administratori i njësisë Ana e Malit, një nga zonat më të përmbytura në Shkodër nuk mjaftohet me akuzat ndaj kryeministrit për mungesë të vëmendjes, por i irrituar shkon më tej duke deklaruar se “Shkodra mund të marrë edhe autonominë”. Arben Ceni thekson se Shkodra ka mjaft resurse që mund t’i menaxhojë vetë, ndërsa kryeministrit i thotë se le të përkushtohet vetëm me Jugun duke e akuzuar për diskriminim.
“Nëse është e nevojshme, Shkodra me këto resurse që ka mund të marrë edhe autonominë, kështu do shkojë puna. 3 hidrocentralet janë në Qarkun e Shkodrës, kemi Thethin, kemi plazhin më të mirë në Shqipëri, Velipojën, kemi liqenin më të madh në Shqipëri. Të gjitha këto janë resurse, domethënë ne s’kemi nevojë. Domethënë po kërkojmë si Katalonja, të ndahemi edhe ne dhe ta menaxhojmë ne Shkodrën, pse ta vëmë në siklet Kryeministrin. Ai të vazhdojë të punojë me Vjosën me Semanin, të mos merret me Drinin e këto”
Deklarata e zyrtarit të lartë të bashkisë së Shkodrës është e pazakontë, ndërsa pritet reagimi i qeverisë, se si do ta komentojë ashpërsimin e toneve me këtë kërkesë radikale nga pushteti lokal. Në bashkinë e Shkodrës në 3 javët e fundit kanë qenë të pranishëm disa nga ministrat e qeverisë Rama për t’u njohur me problemet e qytetarëve. Gjithashtu edhe Lulzim Basha ka qenë dy herë duke i kërkuar Ramës që të shpallë emergjencën. Basha ka akuzuar qeverinë për shkarkimet nga HEC-et.
a.ç
