Ministri i Bujqësisë, Edmond Panariti, i pranishëm në emisionin “Të bësh ekonomi” në News 24 ka sqaruar situatën e krijuar në zonat e prekua nga përmbytjet dhe ndihmën që do t’u ofrohet fermerëve.
Pas reshjeve të shiut, disa zona në vend u përmbytën, aktualisht si është situata?
Ky vit filloi me përmbytje, ashtu siç ndodhi edhe vitin e kaluar. Nuk ka qenë një situatë surprizë, pasi unë e kam shprehur edhe më herët se në Shqipëri ekziston rreziku i përmbytjeve. Për shkak edhe të ndryshimeve klimaterike, kanë ndodhur këto situata në të cilat u ndodhën. Në zonën e Lezhës u regjistruan 100 mm shi, në më pak se dy orë.
Pra gjithë kjo situatë erdhi nga reshjet e dendura?
Më lejoni të flas me shifra. Në një hark kohor prej 2 orësh ka patur 130 mm shi. Lumi Shkumbin është fryrë. Ka dalë nga shtrati dhe ka ushtruar presion mbi argjinaturat, pritat dhe për rrjedhojë patëm edhe atë situatë ku lumi doli në fushë. Kjo ndodh edhe në botë. Situata tek ne është specifike. Si rezultat i zhvillimit urban kaotik, një pjesë e ndërtimeve janë bërë në fushë dhe buzë lumenjve.
Të themi çfarë bëmë ne me sistemin tonë. Sistemi i kanalizimeve dhe hidrovoreve ka punuar në perfeksion, sepse ne kemi punuar gjatë gjithë verës. Unë nuk kam lënë hidrovor pa parë personalisht. Nuk jam bazuar vetëm te raportimet, por unë vetë kam ndjekur gjendjen.
Në muajin tetor situata ishte e rëndë…
Hidrovoret kanë qenë në punë totalisht. Herën e kaluar ka pasur probleme me energjinë dhe jo për kapacitete. Këtë herë u arrit që të furnizohet në mënyrë të qëndrueshme rrjeti i hidrovoreve që bëri që pompat të punojnë me kapacitet të plotë. Një ditë pasi reshjet u ndërprenë dhe lumi i tërhoq, uji u larguar pasi hidrovoret punonin. Aktualisht situata është përmirësuar ndjeshëm. Ka një bilanc paraprak por do na duhen edhe 3 ditë për të bërë një vlerësim të plotë. Dëme në Ndroq, 50 lopë qumështi u mbytën për fat të keq, pjesa tjetër u spostua. Dëmtime në 60 viça. Dëme edhe në Gosë në bagëti. Nuk kemi pasur dëmtime të të mbjellave, por dëmtime të kufizuara të bazës ushqimore.
Banorët në zonën e Sukthit kanë ndarë shqetësimet për dëmet që u janë shkaktuar nga reshjet…
Unë e ndaj shqetësimin e banorëve, kam qenë personalisht në Sukth, duke parë nga afër dëmet që u janë shkaktuar. Ka patur sinjale se një banor ka hapur një portë hidrocentrali privat në Surrel, gjë që ka krijuar një fluks të shtuar uji. Kam njoftuar kryeministrin Rama, dhe po hetohet për këtë çështje. Duhet të njoftohet për kuotat e hidrocentraleve private, dhe të ketë programin për hapjen e portave dhe shkarkimet. Ky fenomen duhet ndjekur, prandaj them se kjo është një përgjegjësi kolektive. Me rëndësi është edhe administrimi i baseneve energjetike, dhe burimeve ujore. Për fat të mirë u bë shpërngulja në kohë e banorëve, për të mos rrezikuar jetën e tyre. Ndërkaq po bëhet vlerësimi i dëmeve.
Sa biznese ka që janë dëmtuar?
Do na duhen edhe 3-4 ditë për një bilanc të plotë. Për të parë shkallën e dëmit dhe mundësitë më pas. Ndërkohë ne do të mbyllim dëmet e shkaktuara një vit më parë.
Sa është fondi për dëmshpërblimet?
Janë 6 milionë euro. Katër milionë euro për bizneset e dëmtuara në basenin e Vjosës. Ne do fillojmë dëmshpërblimin e dëmeve të shkaktuar si disbusim direkt në kontot e këtyre bizneseve. Një pjesë do jepet si grant për të ringritur kapacitetet e dëmtuara. Një fond i vogël do kalojë si asistencë teknike. Duhet të përfundojmë shumë shpejt evidentimin e shkallës së dëmeve.
Balkanweb
