Fondi i Kushtëzuar vjetor për emergjencat civile të Bashkisë do të përdoret për dëmshpërblimin e familjeve të prekura nga përmbytjet, në Vlorë. Kryebashkiaku, Ermal Dredha tha se ka përfunduar procesi i evidentimit të dëmeve dhe pritet që fillimisht dosja të kalojë në Këshillin e qarkut .
“Procesi i evidentimeve ka mbaruar. Bashkia do të përdorë Fondin e Kushtëzuar vjetor për emergjencat civile të cilat përdoren për të tilla raste”, tha Dredha.
Pas përmbytjeve të gjitha institucionet e qytetit janë angazhuar në marrjen e masave për të mos u përsëritur situata të tilla, ndërsa po ndërhyjnë në infrastrukturën e nëntokës dhe sistemimin e kanaleve të ujërave të larta.
“Jemi duke u marrë më pastrimin, ndërkohë jemi duke i ardhur në ndihmë të gjithë atyre familjeve që kanë kërkuar asistencë”, tha Dredha .
Ndërkohë ka nisur puna për rikualifikimin e Bulevardit të Palmave dhe Agrumeve në Vlorë, tender me vlerë 3.4 milion euro.
“Nuk është vetëm rrugë, do të ketë trotuare, korsi për biçikleta, fusha sportive edhe për fëmijët”, deklaroi Dredha.
Sipas kryetarit të Bashkisë projekti që pritet të përfundojë pas 1 viti synon të ndryshojë qasje jo vetëm për banorët e zonës por edhe për biznesin.
/a.r
