Pas ardhjes së tij nga SHBA, Kryeministri Rama, i shoqëruar edhe nga Ministri Tahiri e kreu i Emergjencave Civile Premçi, tha se shkatërrimi që solli përmbytja në zonat e Sukthit, Shijakut e Katundit të ri vjen nga dora e njeriut.
Kreu i mazhorancës u premtoi qytetarëve se do të kenë mbështetjen e plotë të qeverisë, ashtu siç ndodhi edhe me banorët e përmbytur të vitit të kaluar, të cilët shteti i dëmshpërbleu.
“Si asnjëherë më përparë, ato përmbytje që ndodhën në fillim të vitit të kaluar ne i kemi dëmshpërblyer plotësisht, në të gjitha aspektet, edhe në bagëti, edhe për shpendët, edhe për prodhimin. Shtuar këtu faktin që kemi shlyer detyrimet e prapambetura nga qeveria e mëparshme, rreth 7 milionë euro, në ultësirën e Shkodrës. Megjithatë, sërish do të bëjmë çmos që të mbështesim të gjithë njerëzit në nevoje”, tha Rama.
Në bashkëbisedim me banorët e përmbytur, Rama theksoi se ndërtimet kuturu dhe pa plan janë shkaku kryesor i përmbytjeve, duke mos harruar edhe prerjen e pyjeve.
“Mobilizimi i të gjithëve ka qenë maksimal, ashtu sikurse edhe efektiviteti. Nga ana tjetër, duhet të jemi të gjithë të vetëdijshëm, që këto janë faturat që i paguajmë dhe do të vazhdojmë t’ia paguajmë një zhvillimi kaotik, pa plan, pa rregulla, pa disiplinë, me ndërtime e projekte kuturu. Ne kemi bërë një punë të madhe në këtë periudhë dyvjeçare për pastrimin e kanaleve, kemi përsëri një projekt të madh që do ta financojmë me 25 milionë dollarë, në bashkëpunim me pushtetin vendor, për të pastruar të gjitha kanalet dytësore”, deklaroi më tej Rama.
