Presidenti Ilir Meta ka dërguar mbrëmjen e djeshme një ekip Shkodër, për të ndjekur nga afër situatën nga përmbytjet.
Meta ka patur një lidhje telefonike me kryetaren e Bashkisë së Shkodrës Voltana Ademi, ku është diskutuar me detaje në lidhje me situatën e rënduar në qark.
Nga ana tjetër ekipi i dërguar nga Meta ka siguruar prefektin e qarkut të Shkodrës solidaritetin e të gjithë institucionit për përballimin e situatës së rënduar.
Kabineti është i përbërë nga Këshilltari për Mbrojtjen, Gjeneral Brigade Piro Ahmetaj dhe ai për Çështjet Ligjore, Arbër Bashkurti.
Ekipi i dërguar nga Presidenti Meta u takua me Prefektin e Qarkut të Shkodrës, Çesk Millja, kryebashkiaken Voltana Ademi, kreun e Emergjencave Civile, Shemsi Prençi si edhe trupa të Forcave të Armatosura të angazhuar në terren për kryetarë të komunave të zonave të përmbytura.
“Në emër të Presidentit Meta, ju përcjellim të gjithë solidaritetin njerëzor dhe institucional në përballimin e kësaj situate të rëndë duke apeluar angahzim maksimal për sigurën e jetës dhe të pronës”, – u shprehën këshilltarët e Metës.
Ata panë nga afër situatën problematike që ka krijuar moti i keq në Qarkun e Shkodrës, ku sipas të dhënave paraprake raportohet se rreth 3700 ha tokë është e përmbytur, kryesisht në zonat Dajç dhe Ana e Malit./a.m.
