Bashkia e Tiranës do të shembë të gjitha ndërtimet pa kriter të ndërtuara mbi kolektorët e ujit.
Këshilltarja në Këshillin Bashkiak të Tiranës, Elisa Spiropali, gjatë një interviste për Report TV, tha se janë evidentuar të gjitha zonat ku ka probleme të tilla.
“Bashkia e Tiranës ka evidentuar të gjitha zonat ku ka probleme të tilla dhe nuk janë të pakta zonat ku është ndërtuar mbi kolektor, kryesisht zona periferike. Bashkia është zotuar dhe do shqyrtohet edhe në këshill buxheti, që jo në çdo reshje shiu të kemi përmbytje të qytetit të Tiranës. Një prej tyre është prishja e ndërtimeve pa leje që janë bërë mbi zonat e kolektorëve. Njerëz të papërgjegjshëm kanë dhënë leje në mënyrë të tillë, ne po vuajmë pasojat e një zhvillimi urban në të gjithë Shqipërinë. Kemi një moratorium ndërtimesh, për të ndalur hemorragjinë për të parë ku janë problemet. Bashkia e mëparshme nuk ka marrë asnjë masë, kjo është pasojë e 4 viteve keqqeverisje”, tha Spiropali.
Më tej ajo shtoi se “kryebashkiaku Veliaj dje tha do të ketë një vlerësim, aty ku shkaktojnë dëm të madh për njerëzit dhe pronën, do të ketë rishikim të hipotekave, janë të papranueshme. Këta njerëz kanë ndërtuar në një zonë ku prona e tyre është e pambrojtur. Për këtë nuk e kanë fajin ata por informacionet shtetërore që kanë lejuar një gjë të tillë, për shkak të këtyre problemeve nuk mund të penalizohet i gjithë qyteti. Bashkia e Kamzës, Paskuqani – pamjet janë të tmerrshme, njerëz që kanë ngritur shtëpi dhe biznese në një zonë të tillë dhe i shohin tani të përmbyten”.
