Shitjet e tregut të aksioneve të SHBA-së u përkeqësuan të hënën teksa Wall Street po përpiqet të parashikojë se sa dhimbje do të duhet të durojë ekonomia amerikane prej Presidentit, Donald Trump, për shkak të tarifave që ai ka vendosur ndaj partnerëve kryesorë tregtarë të SHBA-së.
S&P 500 ra me 2.1% gjatë mesditës, duke shënuar javën më të keqe që nga shtatori. Dow Jones Industrial Average ra me 405 pikë, ose 0.9%, në orën 11:20 të paradites dhe Nasdaq ishte 3.6% më i ulët.
Shumica e indekseve të mëdha amerikane u luhatën mes humbjeve të konsiderueshme të hënën, por Presidenti Trump hodhi poshtë shqetësimet mbi mundësinë që tarifat e tij të shkaktojnë një recesion.
Në një intervistë që u transmetua në Fox News Channel të dielën në mëngjes, Trump pranoi se planet e tij mund të ndikojnë në rritjen ekonomike të SHBA-së në afat të shkurtër edhe pse ai nuk parashikoi një recesion këtë vit. Trump tha se plani i tij për të rikthyer pasurinë tek amerikanët “kërkon pak kohë”.
Gjithashtu këtë fundjavë, Sekretari i Tregtisë i SHBA, Howard Lutnick tha në “Meet the Press” të NBC se tarifat 25% për importet e çelikut dhe aluminit do të hyjnë në fuqi të mërkurën.
Kryetari Mike Johnson ka besim se Kongresi do të miratojë rezolutën për të ruajtur financimin e qeverisë
Një mbyllje e pjesshme e qeverisë do të fillojë të shtunën nëse Kongresi dështon ta miratojë financimin e qeverisë.
Demokratët thonë se nuk janë pyetur për hartimin e legjislacionit, për të cilin republikanët e Dhomës së Përfaqësuesve thonë se do të shkurtonte 13 miliardë dollarë nga programet jo-mbrojtëse, ndërsa do të rriste shpenzimet e mbrojtjes me 6 miliardë dollarë krahasuar me vitin e kaluar.
I pyetur se çfarë e bëri atë kaq të sigurt, Johnson u përgjigj: “Askush nuk dëshiron të mbyllë qeverinë, dhe ne po qeverisim, duke bërë gjënë e përgjegjshme si republikanë. Do të varet nga Chuck Schumer dhe demokratët e Senatit që të bëjnë gjënë e duhur. Nuk mendoj se do ta mbyllin qeverinë.” AP
