Gjendja shëndetësore e ish-presidentit amerikan Joe Biden është përkeqësuar. Kanceri agresiv i prostatës, me të cilin ai u diagnostikua vitin e kaluar, është përhapur në pjesë të tjera të trupit, përfshirë kockat.
Lajmin e bëri të ditur djali i tij, Hunter Biden, gjatë një interviste për BBC. Ai tha se sëmundja është përhapur dhe se babai i tij po përballet me dhimbje të forta.
“Është përhapur në kocka dhe më tej. Është shumë e dhimbshme dhe, në shumë aspekte, dobësuese”, deklaroi Hunter Biden.
Joe Biden, 83 vjeç, u diagnostikua në maj të vitit 2025 me një formë agresive të kancerit të prostatës. Gjatë vitit të kaluar, ai iu nënshtrua edhe ndërhyrjes për heqjen e disa dëmtimeve kanceroze në lëkurë dhe kreu trajtim me rrezatim.
Pavarësisht gjendjes së tij shëndetësore, Biden ka vijuar të shfaqet në publik. Së fundmi, ai mbajti një fjalim në një aktivitet për mbledhjen e fondeve për Partinë Demokratike në Maryland. Hunter Biden tha se babai i tij vazhdon të luftojë me sëmundjen dhe se do ta bëjë këtë për sa kohë të jetë gjallë.
Edhe Jill Biden ka folur për gjendjen e bashkëshortit të saj. Ajo ka thënë se trajtimi i tij vazhdon dhe se sëmundja tashmë është bërë pjesë e përditshmërisë së familjes.
Kanceri i prostatës prek kryesisht burrat në moshë të madhe dhe në shumë raste zhvillohet ngadalë. Kur sëmundja përhapet në pjesë të tjera të trupit, veçanërisht në kocka, trajtimi bëhet më i vështirë.
Biden ka pasur edhe më parë probleme serioze shëndetësore. Në vitin 1988, ai iu nënshtrua një ndërhyrjeje për një aneurizëm në tru, e cila në atë kohë rrezikoi edhe karrierën e tij politike. Familja Biden është përballur edhe me një tjetër tragjedi të lidhur me kancerin. Djali i tij, Beau Biden, vdiq në vitin 2015, në moshën 46-vjeçare, nga glioblastoma, një formë agresive e kancerit të trurit.
