Presidenti i Shqipërisë, Ilir Meta ka bërë një deklaratë të fortë në një nga intervistat televizive duke thënë se ai përgjohet nga Shërbimet Sekrete të brendshëm dhe të huaja.
Meta ka treguar një rast që lidhet me zgjedhjet e 30 qershorit në vendin tonë. Presidenti ka theksuar se gjatë një udhëtimi me avion i kishte telefonuar Gramoz Ruçit, për anulimin e zgjedhjeve, ndërsa ka shtuar se Ruçit i komunikoi vetëm gjërat bazike, pasi sipas tij telefoni i presidentit përgjohej.
I ftuar në Spotlight nga Alban Dudushi, në Vizion Plus, deputeti i PS-së, Petro Koçi u shpreh se diçka e tillë mund edhe të mos jetë e vërtetë, por thjeshtë një justifikim për një bisedë të caktuar, por në rast se është një informacion i saktë, atëherë për deputetin përbën skandal.
“Normalisht, nëse ai ka një vlerësim të tillë, duhet ta çojë për ndjekje penale faktin, për të zbuluar se kush e përgjon. Se nuk është normale. Normalisht, nëse kjo është e vërtetë duhet që Meta të vërë në lëvizje mekanizmin e zbulimit të çështjes. Sepse, mund të mos jetë edhe e vërtetë, mund të jetë një gjë që ai e thotë për të justifikuar një rast bisede që për mua nuk kishte pse të rezervohej, sepse bëhej fjalë për një çështje politike të rëndësishme. Në qoftë se vërtetë përgjohet, përbën një skandal, por fakti që ai thotë që unë u rezervova të flisja se më përgjohej telefoni, për një çështje e cila është legale… çfarë të keqe ka?”
Deklaratat e Metës për Koçin nuk merren mjaftueshëm seriozisht pasi kohët e fundit ato kanë shprehur edhe çekuilibër psikologjik sipas deputetit.
“’Ne besojmë se telefonat përgjohen’ Kur flet presidenti i Republikës, duhet të flasë në emër të një informacioni të sigurtë, jo të flasë kuturu. Por, ka një gjë, që Meta është një president që nuk merret dhe aq seriozisht. Pra, ne e dimë që vitet e fundit ka bërë lloj-lloj deklaratash të cilat kanë shprehur edhe çekuilibër psikologjik.”
Për ish-Sekretarin për Çështjet Ligjore në PD, z.Çlirim Gjata, ajo çka duhet të ndodhë tani është ndërhyrja e SPAK. Sipas Gjatës, SPAK duhet të nisë menjëherë hetimet.
“SPAKU duhet të ndërhyjë urgjent, të fillojë hetimet, ose Meta të bënte kallëzim, po tani fakti që e ka nxjerrë në media, nuk ka nevojë as për kallëzim. Menjëherë SPAKu duhet të shkonte në zyrën e Metës dhe të merrte të dhënat.”
Edhe avokati Plarent Ndreca shpjegon se si presidenti Meta duhet të jetë më i kujdesshëm në deklaratat e tij, pasi përfaqëson një institucion.
“Presidentit të Republikës nuk i lejohet të flasë gjithçka. Pra, pikërisht sepse është president i Republikës, sepse ai është institucion dhe kur flet presidenti, flet institucioni. Dhe, nëse ne të tjerëve na lejohet të themi diçka më shumë, presidenti i Republikës, duhet të jetë shumë i kujdesshëm, për më tepër të thotë diçka të kësaj natyre, që përbën skandal në vetvete. Kreu i shtetit ‘përgjohet nga institucionet e brendshme’- tha, edhe të huaja. Pra, ka dhe skandal diplomatik, edhe ligjor të brendshëm. Mënyra se si e thotë dhe vetë presidenti dhe pret që të dalë në media për ta thënë, edhe e thotë si një gjë normale, tregon mungesë serioziteti të vetë institucionit që ai përfaqëson.”
/a.r
