Ministri i Brendshëm Sajmir Tahiri i është drejtuar në mënyrë të drejtpërdrejtë Kryeprokurit Llalla, duke thënë se sot u vërtetua se ata që janë kundër reformës në drejtësi janë të gatshëm të bëjnë gjithçka. Fill pas kërkesës së prokurorisë për pezullimin e kreut të Policisë së Shtetit Çako, e cila u zbatua nga gjykata, Ministri Brendshëm ka thënë gjithashtu se veprimi i sotëm, ishte gjesti që tregoi hapur gadishmërinë e kryeprokurorit për të shpëtuar ata që nuk e duan reformën në drejtësi.
“Unë besoj që janë të shumtë ata që rrugës drejt reformimit të sistemit të drejtësisë, ka shumë armiq… janë të shumtë ata që nuk duan që drejtësia të reformohet… Sot u bë shumë evidente se ata që nuk duan reformën në drejtësi janë të gatshëm të bëjnë gjithçka! Sot u pa se kush… është i gatshëm të shpëtojë ata që nuk e duan reformën në drejtësi…
Ne jemi tërësisht të gatshëm të përballemi me cilindo që pengon reformën në drejtësi. Kjo është beteja jonë me të gjithë ata që e kanë sjellë Shqipërinë deri këtu. Kjo është beteja jonë me ata që janë të gatshëm që të bëjnë gjithçka që të mos ketë drejtësi. Unë e kuptoj që opozita gjendet ngushtë… opozita me frontin e të keqes…”- tha Tahiri.
Ministri i Brendshëm Saimir Tahiri shprehu përkrahjen e plotë personale dhe institucionale për drejtorin e përgjithshëm të Policisë së Shtetit, Haki Çako, dhe dy punonjësit e tjerë të pezulluar me kërkesë të prokurorisë për shkak të aferës së përgjimeve. Çako e dy të tjerët akuzohen për shpërdorim detyre, por Tahiri shprehu bindjen se ata nuk kanë bërë asgjë të paligjshme.
“Jam shumë i vetëdijshëm që drejtori i policisë dhe dy punonjësit e tjerë nuk e kanë shkelur ligjin në asnjë sekondë të ushtrimit të punës tyre, nuk kanë bërë asnjë përgjim dhe asgjë të afërt apo të largët me përgjimin… Publikisht jap mbështetjn personale, insitucionale, të Kryeministrit dhe të qeverisë për drejtorin, dy punonjësit dhe çdo punonjës policie në çdo cep të Shqipërisë që kryen detyrën me devotshmëri, përkushtim e ndershmëri”, tha Tahiri, i duartrokitur në këtë deklaratë nga të pranishmit./ java. a.k
