Zbardhen të tjera detaje nga super-operacioni i policisë greke i koduar “Himera”, ku koka e bandës së trafikantëve ishte shqiptari i njohur me emrin “Genti”.
Mediat greke kanë zbardhur mënyrën se si u zbulua organizata, e cila u hetua pasi policia po investigonte për vrasjen e shqiptarit 32-vjecar Rigert Dervishi.
Sipas policisë është zbuluar edhe vrasësi i Dervishit. Ai u zbulua nga një bisedë telefonike kur pas ngjarjes ka komunikuar me kreun e organizatës në Shqipëri, të cilit policia i di vetëm pseudonimin “Genti”.
Ndërkohë mediat greke duke iu referuar videopergjimeve zbulojnë mënyrën e trafikut dhe shpërndarjes së drogës:
“20 njerëz po ecin vazhdimisht lart e poshtë duke pyetur njëri-tjetrin? Ku është? Ku është”? Njëri prej tyre bërtiti “ja ku është” dhe të gjithë shkuan në drejtim të një hoteli, ku ndodhej një njeri me ngjyrë. Ky i fundit, pasi kontrolloi zonën me një vështrim të shpejtë, u dorëzoi 4 burrave secilit nga një paketë plastike që përmbante heroinë”- shkruan gazeta.
Sipas saj, skena të tilla janë filmuar nga policë të fshehtë të policisë greke gjatë 8 muajve që zgjati hetimi.
Policia tha se grupi kriminal shiste kanabis, heroinë dhe kokainë në sheshet kryesore të kryeqytetit grek, ku pjesë e bandës ishin shqiptarë dhe afrikanë.
Mes përgjimeve të telefonit, media greke veçon një pjesë, kur Genti flet me një nga bashkëpunëtoret. “Marr pesëmbëdhjetë, i sjell tek ty, ku i jap letrat unë?” dhe “Genti” i përgjigjet: “Jo, jo, mos më fol kështu”.
Sipas policisë, ende nuk ka një informacion të saktë rreth “Gentit”, por dihet tashmë skema e organizimit dhe funksionimit të organizatës kriminale.
Ai thuhet se është në Shqipëri, por ka dyshime, nesë porositë dhe drejtimin e bënte nga Shqipëria dhe se nuk kishte shkelur në Greqi ndonjëhere.
Dje polica greke prangosi 59 persona, ku 38 prej tyre u është komunikuar arresti në burg, ndërsa 46 janë shpallur në kërkim, duke plotësuar kështu totalin prej 146 anëtarësh të organizatës kriminale.
SKEMA E BANDES
Sipas policisë greke, grupi funksiononte në këtë mënyrë: Në nivelin e parë qëndronte “Genti”. Poshtë tij ishin 4 shtetas shqiptarë, më pas 3 shqiptarë e 4 grekë, në nivelin e katërt 3 grekë merreshin me trafikun në kufirin greko-shqiptar, ndërsa në nivelin e pestë ishin 17 shqiptarë, 1 grek, 1 bullgar e 1 rumun, që kryenin magazinimin e drogës.
Në nivelin e gjashtë, 6 shqiptarë, 3 grekë dhe 1 bullgar, shpërndanin drogën kundrejt shitësve të vegjël dhe në nivelin e fundit ishin gjithë tregtarët e sasive të vogla të drogës në qendër të Athinës, kryesisht shtetas afrikanë.
Mendohet se grupi kontrollonte rreth 35% të tregut të narkotikëve në Athinë, duke bërë që goditja e tij të ulë ndjeshëm shitjen e drogës në këtë zonë.
Policisë greke iu desh rreth 8 muaj të hetonte grupin. Gjashtë oficerë grekë, pjesë e operacionit, kryen filmime gjatë veprimtarisë së të dyshuarve.
Vrasja e Dervishit
Mësohet se hetimet policore kanë zbuluar një lidhje të mundshme të grupit me vrasjen e 32-vjeçarit shqiptar Rigert Dervishi, në Keratsini të Athinës, më 13 nëntor të këtij viti.
Sipas Policisë, Dervishi ishte drejtues i mjetit, por është vrarë gabimisht, pasi objekt i atentatit ishte një 36-vjeçar shqiptar, pasagjer në mjet, të cilin banda kishte tentuar ta vriste me bombë me telekomandë, më 14 shtator 2016, për një borxh./Panorama/am.
