Kush tjetër është në rrjetën e skandalit të fqinjit përtej? Ka marrë një drejtim deri diku të pritshëm skandali i përgjimeve në Maqedoni. Ilir Meta, kryetar i Kuvendit është emri i parë nga Shqipëria që del në listën e përgjimeve, në të paktën një lidhje telefonike me Menduh Thaçin, një nga drejtuesit e rëndësishëm politikë në Maqedoni.
Kryetari i PDSH-së Thaçi i ka kërkuar Metës që të marrë pjesë në një manifestim dhe ai e ka pranuar një gjë të tillë. Eshtë një bisedë shumë diskrete dhe nuk ka asgjë më shumë sesa komunikim i dy politikanëve në dy vende të ndryshme, por që mbi të gjitha, flasin të njëjtën gjuhë, shqip. Por ka një tjetër shqetësim që sot është artikuluar në korridoret e politikës: kush tjetër është në listën e pafundme të përgjimeve maqedone dhe për çfarë arsyesh.
Ka një mori interesash edhe ekonomike që lidhin politikanët në të dy anët e kufirit. Ish-ministra të djeshëm dhe disa nga ministrat e sotëm, dyshohet se janë gjithashtu të përgjuar nga maqedonasit. Do thënë se ky përgjim ka ardhur në mënyrë indirekte, domethënë, abonenti nga kjo anë e kufirit ka rënë pre e faktit që njeriu nga ana tjetër e kufirit me të cilin fliste, ishte nën përgjim.
Megjithatë, edhe kjo valë do të kalojë si gjithë të tjerat e ngjashme në Tiranë, në Shkup apo në Ballkan në përgjithësi. Duket se asgjë nuk mund të habisë askënd këtej rrotull.
Redaksia Online
(JavaNews.al)
