Dyshimi që politikanët shqiptarë marrin ryshfet, ekziston prej kohësh në opinionin publik paçka se në gjithë këto vite nuk ka asnjë të dënuar. Por këtë radhë është një biznesmen italian i cili e pranon një fakt të tillë.
Ditën e djeshme, në Itali janë vënë në pranga një biznesmen dhe 3 zyrtarë të lartë të Anas Toskana. Siç raportojnë mediat italiane, ata janë përgjuar prej kohësh nga ana e Prokurorisë së Firences nga ku është zbuluar se 4 të arrestuarit janë përfshirë në shkëmbime favoresh dhe rryshfete në fondet e dhëna për ndërtime e riparime rrugësh, veçanërisht tipi i fondeve të dhëna për raste emergjencash si shembje dhe dëmtime nga koha e keqe.
Shtypi italian shkruan se ndaheshin përqindje për shuma që shkonin nga 190 mijë euro në 3 milionë euro. Nën hetim janë edhe 24 zyrtarë të tjerë shtetërorë të Anas.
“Të gjithë janë të korruptuar dhe të korruptueshëm” dëgjohet në përgjime t’u thotë miqve të vet biznesmeni i arrestuar.
Ai ankohej se kishte shpenzuar rreth 200 mijë euro në vit për udhëtime turistike dhe dhurata për gratë e zyrtarëve të shtetit që firmosnin fondet.
Por në një nga përgjimet është edhe vendi ynë. Përgjimi i datës 3 Prill 2015 tregon bisedën mes biznesmenit të arrestuar dhe të dashurës së tij. Kjo e fundit i tregon se motra e vet di si shkojnë gjërat në Shqipëri.
“…mund të takosh kollaj një funksionar të lartë politik por duhet një zarf i mbushur mirë për këtë tipin që njeh personazhin që merr zarfin..”
