Operacioni Forca e Ligjit ka dërguar një rekord formularësh këtë të premte, duke “trokitur” në derën e 7 të dënuarve për krime të rënda në Fier, Lushnje, Berat, Elbasan dhe Tiranë.
Tre prej tyre janë të dënuar për vrasje. Mes tyre, Shaban Lami, ish-efektiv i Komisariatit të Policisë nr.5 në Tiranë i cili u dënua me 10 vjet burg për vendosjen e një sasie tritoli në automjetin e efektivit Sh. Toplana. Ngjarja ka ndodhur me tetori 2013 në kryeqytet.
Shpërthimi në automjetin e komandantit të Njësisë së Patrullës së Përgjithshme në Komisariatin nr.6 Tiranë shkatërroi vetëm mjetin, pa i shkaktuar dëme fizike Toplanës. Motiv i tentativës së vrasjes ishte hakmarrja për faktin se Toplana një ditë më parë kishte shoqëruar në polici djalin e të pandehurit Lami, pasi e kishte ndaluar duke drejtuar një automjet pa dokumentacion.
Për këtë ngjarje u dënua me 30 vjet heqje lirie edhe nipi i tij Renato Kazani.
OFL i ka nisur kërkesat me shkrim për vetëdeklarimin e burimeve të pasurisë, shtetasve:
-Faslli Buzi, banues në Fier,i dënuar për veprën penale “Vrasja me paramendim”, e kryer në bashkëpunim;
-Nazmi Aliu (alias Buzi), banues në Fier, i dënuar për veprën penale “Vrasja me paramendim”, e kryer në bashkëpunim;
-Dëfrim Kurtdeda (alias Dëfrim Sina), banues në Lushnje, i dënuar për veprat penale “Trafikimi i narkotikëve”, i kryer në bashkëpunim, i mbetur në tantativë dhe “Prodhimi dhe shitja e narkotikëve”, i kryer në bashkëpunim;
-Maliq Hyka, banues në Fier, i dënuar në Itali për veprat penale “Organizata kriminale” dhe “Trafikimi i narkotikëve”;
-Shaban Lami, banues në Tiranë, i dënuar për veprën penale “Vrasja e punonjësve të Policisë së Shtetit”;
-Arjan Dalipi, banues në Elbasan, i dënuar për veprën penale “Trafikimi i narkotikëve”;
-Marsel Selamaj, banues në Berat, i dënuar në Itali për veprat penale “Organizata kriminale” dhe “Shfrytëzimi i prostitucionit”.
Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së dhe më pas, përgjigjet e marra do t’i dërgohen SPAK-ut, për veprime të mëtejshme.
g.kosovari
