(Update) Rreth 7 orë pasi kreu krimin makabër duke vrarë me armë zjarri bashkëshorten e tij dhe vjehrrin, Artan Petova ka vrarë edhe veten.
41-vjeçari i dha fund edhe vetes me armën e krimit, pasi qëndroi 7 orë i hipur mbi shtyllë ku kërcënonte për vetëvrasje.
Mëngjesin e sotëm në Shijak, ai vrau me armë zjarri gruan e tij Zana Petova dhe vjehrrin Ismet Leka për shkak të një grindje në çift. Sipas dëshmitarëve, autori ishte një i alkolizuar dhe konfliktet në çift ishin të vazhdueshme.
Përgjaket Shijaku, burri vret gruan dhe vjehrrin para fëmijëve, kërcënon me vetëvrasje mbi shtyllë
Krimi brenda familjes ka përgjakur mëngjesin e kësaj të diele, ku burri ka vrarë me armë zjarri bashkëshorten e tij dhe vjehrrin. Ngjarja ka ndodhur në Shijak të Durrësit, rreth orës 8:00, ku Artan Petova, 37 vjeç ka qëlluar me armë gruan e tij Zara Petova, 35 vjeç dhe më pas babain e saj Ismet Lekën.
Mësohet se krimi i rëndë ka ndodhur pas një sherri të çastit në banesën e çiftit tek “Katër rrugët e Shijakut”. Dyshohet se në banesë kanë qenë edhe fëmijët të cilët kanë parë edhe ngjarjen e rëndë.
Pas vrasjes së dyfishtë autori ka hipur në një shtyllë elektrike dhe kërcënon me vetëvrasje. Fqinj e të afërm të familjes pohojnë se kryefamiljari pasi ka parë se çfarë ka bërë ka kaluar në gjendje shoku.
Forcat e Policisë janë mbledhur në vendin e ngjarjes dhe po mundohen të bindin autorin të mos kryejë vetëvrasjen.
