Futbolli indonezian është tronditur nga lajmi se portieri i klubit Persela Lamongan, Choirul Huda ka vdekur pas një përplasje me një kundërshtar në mes të lojës.
Portieri 38-vjeçar u rrëzua në fund të pjesës së parë në një takim me skuadrën Semen Pedang pas një përplasje me shokun e ekipit Ramon Rodrigues dhe sulmuesin e skuadrës Pedang, Marcel Sacramento.
Duke provuar ta zë hapësirën e portës së tij për të bllokuar topin, Huda humbi vetëdijen brenda zonës së tij të penalltisë.
Stafi mjekësor nxitoi në ndihmë dhe shpejt e shoqëroi atë nga fusha me një barelë dhe e dërgoi me shpejtësi në një spital lokal.
Megjithatë, trajneri i Perselas, Aji Santoso, konfirmoi pas ndeshjes se Huda, fatkeqësisht kishte humbur jetën.
“Të gjithë lojtarët përfunduan ndeshjen dhe shkuan në spital, ku u njoftua se Choirul Huda kishte vdekur”, iu ka thënë Santoso gazetarëve.
“Humbja e Choirul Huda na ka goditur të gjithëve. Nuk kishim kohë për të parë ndonjë mjek, vetëm për të parë trupin e tij”, përfundoi trajneri i Perselas.
Më vonë, doktori Zaki Mubarok, nga Spitali i Përgjithshëm, njoftoi se Huda kishte vdekur si rezultat i traumës së kokës dhe qafës.
“Ai vdiq, sepse përplasja në kokë dhe prapa qafës ishte e fortë”, deklaroi ai.
Huda është një figurë legjendare në Lamongan, pasi e ka kaluar gjithë karrierën e tij duke luajtur me Perselan. Ai bëri debutimin e tij në vitin 1999 dhe ishte titullar gjatë gjithë kohës së tij me klubin. /Telegrafi/
