Ka përfunduar numërimi i votave për kandidatët në listat e hapur në 10 qarqe, Shkodër, Kukës, Dibër, Durrës, Berat, Korçë, Gjirokastër, Vlorë, Elbasan dhe Lezhë. Ndërkohë në Tiranë dhe në Fier, numërimi vijon ende.
Koalicioni PD-ASH do të dërgojë në Kuvend vetëm 6 deputetë nga listat e hapura në këto qarqe. Në Durrës, më i votuari rezulton Arian Ndoji me 8125 vota. Në Korçë, Fidel Kreka ka mundur të marrë mandatin e deputetit, teksa grumbulloi 6523 vota. Në Kukës, PD-ASHM ka nxjerrë deputet nga lista e hapur Shkëlqim Shehun, i cili mori 7493 vota. Në Lezhë, deputetë nga lista e hapur kanë dalë Gjin Gjoni me 8873 vota dhe Kastriot Piroli me 5632. Në Kuvend do të shkojë si deputet edhe Bardh Spahia, i cili në listën e hapur të PD-ASHM në Shkodër mori 9414 vota.
Ndërkohë, Partia Socialiste ka nxjerrë 18 deputetë në listat e hapura në këto 10 qarqe.
Në Berat, më të votuarit rezultojnë Hysen Buzali me 8209 vota, Fadil Nasufi me 6327 vota dhe Hatixhe Konomi me 3372. Në Dibër PS do të çojë në Kuvend vetëm një kandidat nga listat e hapura, ku më i votuari rezulton Agron Malaj me 12616 vota. Në Durrës më të votuarit që do të marrin ulëse në Parlament janë, Arkend Balla me 18364 vota , Ani Dyrmishi me 11538 vota dhe Etleva Budini me 3967 vota.
Në Elbasan janë 5 deputetë që dalin nga listat e hapura, konkretisht Sara Mila me 18626 vota, Saimir Hasalla me 9361 vota, Olsi Komici me 9020vota, Aulona Bylykbashi me 8315 vota dhe Agron Gaxho me 5969 vota.
Në Gjirokastër, 2 më të votuarit që do të shkojnë në Kuvend janë Tërmet Peçi me 9468 vota dhe Piro Dhima që ka marrë 6902 vota. Në Korçë nga radhët e socialistëve, do të shkojnë në Kuvend Ilirjan Pendavinji që ka marrë 10133 vota, Bledi Çomo me 9478 vota dhe Besa Spaho me 6691 vota. Në Lezhë ka siguruar një ulëse në Kuvend Marjeta Neli, e cila ka marrë 6745 vota.
Ndërkohë në Tiranë dhe në Fier vijon ende numërimi. Deri më tani, në Tiranë, ku koalicioni PD-ASHM do të nxjerrë vetëm një deputet nga lista e hapur, më e votuara rezulton Jorida Tabaku, e ndjekur nga Ilir Alimehmeti. Ndërsa në Fier ky koalicion nuk nxjerr deputet nga lista e hapur.
Në Tiranë PS do të nxjerrë 7 deputetë nga lista e hapur, ku më të votuarit deri më tani rezultojnë Blendi Gonxhja, Ervin Hoxha, Erion Braçe, Fatmir Xhafaj, Orlando Rakipi, Anila Denaj dhe Kejsi Elezi. Ndërsa në Fier, ku PS do të nxjerrrë 7 deputetë nga lista e hapur, më të votuarit deri më tani janë Ceno Klosi, Klevis Jahaj, Asforal Haxhiu, Antoneta Dhima, Elton Korreshi, Zegjine Çaushi dhe Dhimitër Kruti.
