Familjarë, miq dhe figura të njohur atë drejtësisë e politikës bënë homahe në nder të gjyqtarit Astrit Kalaja, që u vra dy ditë më parë në sallën e gjyqit Gjykatën e Apelit të Përgjithshëm në Tiranë gjatë kohës që po ushtronte detyrën.
Pas mbylljes së homazheve shtetërore në Pallatin e Kongreseve, Kortezhi me trupin e tij është nisur drejt Shkodrës, ku familjarët do të presin vizita deri në orën 16:00. Më pas, Kalaja do të përcillet për në baznesën e fundit në varrezat Stom-Golem.
I pranishëm për të bërë homazhe ishte edhe kryeministri Edi Rama, i cili la një mesazh në librin e ngushëllimeve.
“Një tragjedi e madhe për familjen, të afërmit, kolegët dhe vetë shtetin, u prehtë në paqe dhe të rroni e ta kujtoni gjjthnjë. Edi Rama”, ka shkruar Rama.
Ish-ministri i Drejtësisë Ulsi Manja tha se humbi një mik të vjetër, por drejtësia humbi një gjyqtar me integritet.
Nga të pranishmit, u ngrit edhe çështja e sigurisë në gjykata. Kreu i Gjykatës së Lartë, Sokol Sadushi tha se siguria në gjykatat shqiptare është në nivelin zero dhe se gjyqtarët duan siguri që të japin drejtësi.
“Patjetër që duhen marrë masa se situata është shumë kritike. Gjendja në gjykatat shqiptare është e papranueshme, siguria është në nivelin zero. E them me bindje të plotë dhe nuk mund ta lejojmë një gjë të tillë. Gjyqtarët duan siguri që të japin drejtësi”, u shpreh ai.
Kalaja u qëllua për vdekje nga Elvis Shkambi, xhaxhai i të cilit, Gjon Shkambi ishte palë në gjyqin që po zhvillohej për një çështje pronash. Të plagosur gjithashtu mbetën dhe babë e bir, Ragip dhe Ervis Kurtaj, të cilët ishin palë e tretë në këtë çështje.
