Drejtori i Radio Televizionit publik Shqiptar Martin Leka, i kontaktuar nga JavaNews.al e cilësoi si të shkëlqyer performancën e këngëtares Elhaida Dani natën e sotme gjysmëfinale të Eurovizion, edhe pse siç tha ai kishte gjithnjë besim tek këngëtarja shqiptare.
Zoti Leka u shpreh mjaft i lumtur që Dani arriti të kualifikohej për në natën finale, ndërsa theksoi se paraqitja e sotme e Danit lë të kuptosh se ajo ka ende shumë për të dhënë. Drejtori i RTSH-së shprehu bindjen se, edhe pas paraqitjes së sotme, Shqipëria ka shanse reale për një nga vendet e para në Eurovizion dhe pse jo edhe fituese.
Leka kërkoi nga të gjithë shqiptarët kudo që ndodhen të votojnë sa më shumë për Elhaidën në natën finale.
“Ishte një performancë e shkëlqyer. Elhaida Dani tregoi sot se ka ende shumë për të dhënë nga repertori dhe vokali i saj. Dua të fale nderoj të gjithë stafin që kanë punuar për këtë arritje. Por jam shumë i sigurtë se me performancën e sotme do të mund të marrim një vend sa më të mirë në Eurovizion. I bëj thirrje të gjithë shqiptarëve që të mbështesin sa më shumë Danin në natën finale.” tha Martin Leka për JavaNews.al
