Kanë dalë përpara togave të zeza në Gjykatën e Vlorës, 4 të arrestuarit si pjesë e aksionit policor “Transnacional”. Përpara gjykatës së shkallës së parë në Vlorë, përgjatë të dielës kanë dalë shtetasit me inicialet M.P 27 vjeç, N.K 23 vjeç, M.S 22 vjeç (të gjithë me banim në Ukrainë), si dhe O.T, 24 vjeç banues në Minsk të Bjellorusisë.
Për të katërt Prokuroria e Vlorës ka kërkuar masën e sigurisë arrest me burg. Gjykata vendosi që për dy prej tyre të lërë në fuqi masën e sigurisë së kërkuar nga organi i akuzës, ndërsa për dy të tjerët ka dhënë masën e sigurisë “detyrim paraqitje” duke urdhëruar lirimin e tyre nga qelitë e paraburgimit.
Sipas informacioneve për dy shtetasit nga Ukraina me iniciale N.K dhe M.S është dhënë masa e sigurisë detyrim paraqitje, pasi sipas gjykatës për këta persona nuk ka prova që të kenë qenë të përfshirë direkt në këtë veprimtari kriminale.
Ndërsa për dy të tjerët M.P banues në Harkov, si dhe O.T banues në Minsk është caktuar masa arrest me burg.
Si pjesë e këtij aksioni është arrestuar edhe një shtetas i pestë, O.K. 24-vjeçari banues në Ukrainë u vu në pranga ditën e djeshme dhe seanca gjyqësore për të pritet të zhvillohet në ditët në vijim.
