Shpikësi danez Peter Madsen, i dënuar me burgim të përjetshëm në 2018 për vrasjen e përdhunimin e gazetares suedeze Kim Wall, ka pranuar për herë të parë krimin në një dokumentar televiziv.
49-vjeçari u shpall fajtor për vrasje me paramendim, sulm seksual, prishje të trupit të viktimës, por kishte insistuar gjatë gjyqit se vdekja e Wall në nëndetësen që ai kishte ndërtuar vetë, kishte qenë një aksident.
Në regjistrimet e fshehta me Peter Madsen të publikuara sot, gazetari Kristian Linnemann e pyet inxhinierin nëse kishte vrarë 30-vjeçaren Wall, kur ajo kishte ardhur për një intervistë në nëndetësen e tij. Përgjigja e tij ishte “Po”.
“Është faji im që ajo vdiq. Është faji im sepse unë e kreva krimin. Vetëm unë jam fajtor,” thotë Madsen në regjistrimet e dokumentarit.
Në program thuhej se kishte më shumë se 20 orë regjistrime të bisedave me Madsen dhe regjizori Pil Gundelach Brandstrup tha se përgjigjet e Madsen ishin pranim i akuzave të prokurorëve, që deri tani ai i kishte mohuar.
E ndjera Wall, e cila kishte shkruar për gazeta ai Guardian e New York Times, u pa për herë të fundit e gjallë në nëndetësen Nautilus, më 10 gusht 2017. Trungu i saj i copëtuar u gjet në brigjet e Copenhagen 10 ditë pasi ishte shpallur e humbur, ndërsa koka, këmbët e rrobat u zbuluan në qese te hedhura ne det në tetor.
Madsen fillimisht pretendonte se e kishte lënë në tokë gazetaren, pastaj ndryshoi historinë duke thëne se kishte vdekur gjatë një aksidenti në bordin e nëndetëses 17 metra të gjatë.
