Me zemrën e thyer, por duke e ditur se vajza e tij e dashur, Irina Alvarez Esquivel, tani është një engjëll në qiell, futbollisti i KF Tiranës, Freddy Alvarez, dha për herë të parë një mesazh, pas tragjedisë në të cilën vajza e tij e madhe, vetëm nëntë vjeçe, humbi jetën në Shqipëri.
Futbollisti mbërriti të enjten në territorin kombëtar së bashku me bashkëshorten e tij Maria Fernanda Esquivel dhe djalin e tyre pesë vjeçar. Ata udhëtuan me të njëjtin fluturim me të cilin mbërriti edhe trupi i vogëlushes, vdekja e së cilës tronditi vendin një javë më parë.
Sipas asaj që mësoi La Nación, në aeroport i priste Jose Luis Rodriguez nga ‘Fútbol Consultants’, i cili është përfaqësuesi i futbollistit.
Është e kuptueshme që mesfushori dhe bashkëshortja e tij nuk kishin forcë mendore për t’u marrë me këto çështje dhe mes dhimbjes dhe tronditjes, ai u shndërrua në shtyllën kryesore për të menaxhuar riatdhesimin e ndërlikuar nga Europa.
Falë ndërhyrjes së tij dhe mbështetjes së klubit KF Tirana të Shqipërisë, familja arriti të përshpejtojë procedurat ligjore në një moment kur forcat mungojnë.
Nga Guanacaste mbërriti familja e futbollistit dhe nga San Ramón, të afërmit e bashkëshortes së tij. Të gjithë ishin aty në aeroport, për një ribashkim që rezultoi shkatërrues, përballë një situate kaq të vështirë.
Pas mbërritjes në vend, mbetej edhe një procedurë tjetër, pasi për shkak të kohës së kaluar, autoritetet e Ministrisë së Shëndetësisë duhej të ekzaminonin trupin për të vendosur nëse ishte e mundur të zhvillohej një ceremoni mortore, apo nëse duhej të bëhej menjëherë varrimi.
Pas kontrollit të parashikuar nga protokolli, lajmet ishin disi ngushëlluese; trupi kishte mbërritur në gjendje të mirë, duke i lejuar familjes të përmbushë dëshirën për t’i dhënë lamtumirën vogëlushes të rrethuar nga njerëzit e saj të dashur.
“Engjëllin tonë Irina do ta përcjellim këtë të premte (dje). Të gjithë ata që dëshirojnë të na shoqërojnë, mund ta bëjnë këtë në Playa Brasilito. Falenderoj të gjithë ata që na dërguan mesazhe mbështetjeje në këtë moment të vështirë. Faleminderit”, u shpreh Freddy Alvarez përmes një mesazhi në llogarinë e tij në Facebook, duke thyer heshtjen pas tragjedisë.
Shtëpia funerale e mori trupin në aeroport dhe pas mesnate, Freddy Álvarez dhe e gjithë familja e tij u nisën drejt Brasilitos, në Santa Cruz. Funerali i Irinës do të mbahet këtë të shtunë (sot).
Një tragjedi që shkaktoi tronditje në Shqipëri dhe Kosta Rika
Freddy Alvarez kishte nisur me entuziazëm etapën e tij te KF Tirana, pas periudhës së kaluar te Municipal Liberia. Megjithatë, një javë më parë, fatkeqësia trokiti në derën e tij.
Edhe pse nuk ka një raport zyrtar të detajuar, mediat lokale në vendin europian raportuan se vogëlushja pësoi një aksident shtëpiak, pasi ra nga një shtrat marinari.
Sot, larg fushave dhe golave, futbollisti dhe familja e tij po përballen me ndeshjen më të vështirë të jetës së tyre, por e bëjnë këtë në tokën e tyre, mes njerëzve të tyre dhe nën diellin e provincës që i do aq shumë, atë plazh ku Irina ishte gjithmonë e lumtur. / Fanny Tayver Marin – La Nacion
