Gara për vendin e dytë është një mision më se i arritshëm për kombëtaren shqiptare të futbollit. Një objektiv që mund të arrihet që mbrëmjen e sotme, pasi në ‘Elbasan Arena’ na pret një duel tepër i lehtë të paktën në letër përballë San Marinos. Kuqezinjtë tanë nisen të favorizuar për të marrë 3 pikët nga ky duel.
Përveçse në cilësi, ekipi ynë është dhe më lart në renditjen e FIFA-s, konkretisht në vendin e 69-të, ndërsa San Marino pozicionohet në vendin e parafundit pra e 209 në Botë. Një fitore kundër ishulloreve, e koordinuar dhe me një barazim ose humbje të Polonisë përballë Anglisë do e ngjiste kombëtaren tonë në vendin e dytë, duke e vendosur më pranë kualifikimit në turneun më të madh ndërkombëtar të futbollit për herë të parë në historinë e tyre.
Tre futbollistë që munguan ndaj Hungarisë për shkak kartonash, Hysaj, Bare dhe Manaj pritet ta nisin nga minuta e parë, me trajnerin Edi Reja që nuk kërkon t’i lë asgjë befasive. Përballja e sotme do jetë e katërta mes tyre, me historinë që flet kuqezi.
Shqipëria triumfoi 0-2 ndaj San Marinos në ndeshjen e vajtjes, për të përmirësuar bilancet e golave ndaj kombëtares modeste, me 8 gola të shënuar nga lojtarët tanë pa pësuar asnjë. Sfida e sotme është programuar për t’u luajtur në orën 20:45.
/a.r
