Sekretari i Përgjithshëm i Partisë Socialiste Damian Gjiknuri foli në konferencën për gazetarët për ndërhyrjet në kodin zgjedhor për zgjedhjet e ardhshme vendore.
Ai deklaroi se procesi është vonuar për shkak se opozita nuk ka sjellë emrat e komisionit për shkak të problemeve të saj të brendshme.
Megjithatë Gjiknuri theksoi se për zgjedhjet lokale kodi zgjedhor nuk ka mungesa dhe kjo sipas tij u vu re edhe në zgjedhjet e 6 Marsit. Sa i takon parlamentareve të ardhshme, Gjiknuri shtoi se duhen disa ndërhyrje në kod, duke cekur votën e emigrantëve.
“Objektivi i Komisionit Hetimor është i përcaktuar qartë. Deri tani nuk e kemi filluar këtë proces për shkak se opozita nuk ka përcaktuar emrat e saj për shkak të kaosit politik ku është përfshirë. E mira është që ky proces të fillojë. Nuk ka emergjenca apo nxitim sepse kodi zgjedhor është i plotë. Nuk ka asnjë vërejtje që pengon propesin zgjedhor. Në këtë pikëpamje nuk ka emergjencë.
Për zgjedhjet e përgjithshme do duhen disa ndërhyrje në kod. Vota e emigrantëve është sanksionuar në kod por do një lloj dakordësie. Nëse gjatë negociatave dalin çështje të tjera kjo mbetet për t’u parë”, deklaroi ai.
Duke u ndalur te zgjedhja e presidentit, Gjiknuri u shpreh se PS është e hapur për çdo propozim nëse do hidhen në tryezë emra që nuk kanë interesa politikë të momentit dhe mund të qëndrojnë mbi palët.
“Në momentin kur PS bën thirrje për t’u ulur në tavolinë thirrja është e sinqertë. Kemi një kalendar dhe dakordësinë për t’u ulur dhe për bërë profilin pse jo për të dëgjuar edhe ndonjë emër nga ata. Mendoj që veprimet e PS kanë qenë në funksion të sinqeritetit. Në momentin kur diskutojmë për profil mund të jetë një emër që mund të ketë pëlqyeshmërinë e të dyja palëve. Nuk paragjykojmë as emra nga opozita dhe as emra nga maxhoranca.
Kam qenë pjesë e negociatave dhe kur ulesh në një negociatë ulesh pa paragjykime. Duam të gjejmë një njeri pa interesa të çastit politik. Ilir Meta u zgjodh sepse ishte pjesë e maxhorancës në atë kohë por punoi si të imponohej si figurë e mundshme e lidershipit të ardhshëm opozitar. Gjetja e një profili mbi palët, të hapur për dialog dhe të respektosh kushtetutën, në momentet kur zhvishesh nga interesat. Ka njerëz që kanë qenë në politikë por e kanë mbyllur karrierën e tyre në politikë. Në këtë pikëpamje emri është një gjë që do të dalë për profilin më të mirë të mundshëm të presidentit që meritojnë shqiptarët”, tha ai.
g.kosovari
