Interesat e bonove të thesarit regjistruan rritje të lehtë në ankandet e ditës së martë. Sipas të dhënave nga Banka e Shqipërisë, bonot me maturim 12-mujor u emetuan me një interes mesatar të ponderuar prej 1.57%, nga 1.53% në ankandin e mëparshëm.
Ky është ankandi i tretë radhazi që interesat e bonove 12-mujore rriten. Në rritje lëvizën edhe interesat e bonove me maturim 3-mujor, në 0.9%, nga 0.86% në ankandin e mëparshëm.
Ulja drastike e interesave duket se e ka zbehur disi interesin për të investuar në bono dhe në ankandet e sotme shuma e kërkuar për financim nuk u sigurua e plotë, për bonot me maturim 6-mujor.
Megjithatë, nuk pritet që rritja e interesave të vijojë në përmasa të mëdha. Tregu financiar ngelet mjaft likuid, ndërsa normat e interesit të depozitave janë të ulëta./a.k
