Nga Bajram Peçi
Bizneset e burimeve ujore, ato që po shkretojnë Shqipërinë, në orvatjen e tyre për të rrëmbyer ujrat e burimeve të Kuçit të Labërisë, kanë siguruar edhe një Vendim prej Këshillit Kombëtar të Restaurimeve, pranë Ministrisë së Kulturës. Nga sa do lexoni në vendim, ndërtimin e një HEC-i me ujin e Buronjave e Lëpushës, monumente natyrore këto (e jo kulturore) të kategorisë së parë, e deformojnë natyrën e monumentit, në mënyrë që të justifikojnë arsyen se pse u dashka Këshilli Kombëtar i Restaurimeve të japi leje: po ndërtojeni HEC-in sepse ju do marrkeni përsipër restaurime!? Hahaha…do shihni më poshtë qesharakët vendimmarrës se sa të paturp janë!
Në atmosferën fluide, të patejdukshme të vendimmarrjeve, ku gjërat zhvillohen në fshehtësi, ku fryma e mbajtjes sekret larg komunitetit të interesuar, motivi mbi të cilin kryhen pislliqet është mungesa e sinqeritetit, i cili është i mundshëm vetëm në ndërgjegje të sprovuara morale. Vetiu del në përfundimin se mashtrimi paska qenë qëllimi i tyre. Kemi mundur të depërtojmë te ky vendim, i cili ja mbërrin që kushdo të shqyejë sytë nga habia!
Ky vendim i nxjerrë dhe firmosur nga Ministrja Kumbaro për lejimin e projektit të firmës që do të shfrytëzojë ujrat në Kuç për të fituar para përmes HEC-it, qënka bindur të japi leje se projektuesit e HEC-it do marrkanë përsipër të bëjnë restaurimin e një shtëpie që është… në fshatin Mesaplik, Bashkia Selenicë…po mor po, në Mesaplik, 40 km më tej Kuçit!? HEC-i (që nëse parallintë ja mbërrijnë ta bëjnë) shkreton zonën dhe është mallkim për komunitetin, natyrën, gjallesat, bëhet në Kuç ndërsa restaurimin që bëjnë “dhuratë” e kryejnë në një fshat 15 km larg Kuçit, në Smokthinë …!???
O bashkëfshatrët e mi kuçjotë, askush nuk ju ka tallur dhe nëpërkëmbur, siç po jua bëjnë tani! Vetëm një llogjikë me shëndet mendor të dëmtuar, mund të bëjë lidhje të tilla tallëse!
Pavarësisht që Kuçi nuk është dakord e nuk do ta lejojë ndërtimin e një HEC-i me ujin e Lëpushës e Buronjave, si është e mundur o burra, që privimi i banorëve nga e drejta e përdorimit të resurseve natyrore (që me gjasa, do do shkulen nga rrënjët) leja, përshembull, të lidhej me restaurimin dhe vitalizimin e monumentit natyror madhështor, Buronjave; me restaurimin e Qendrës Shëndetësore; me restaurimin e varrezave të dëshmorëve; me ndërtimin e një rruge për në varrezat e fshatit apo me restaurimin e ish Shtëpisë muze në fshat …?
Ata, ministria dhe miqtë e tyre, habiten me çfarë kërkojmë! Ne kuçiotët “naivë”, që nxitojmë ditën e votimit se mos na ikin këta socialistët nga pushteti, duhet ta lexojmë këtë vendim për të mësuar se sa na duan!
Humbja më e turpshme e dinjitetit tonë është se ajo vjen nga pakujdesia jonë. E drejta jonë, për t’i përbuzur formuluesit e këtyre vendimeve, është bashkimi. Kuçjotë, të jemi njësh sëbashku! Shoqata “Vëllazërimi kuçjot” po ndërmerr gjithë hapat e nevojshme ligjore për t’u treguar vendin si projekteve të tilla hartuar larg komunitetit ashtu dhe administratës shtetërore, “bashkëpunuese” e “mirëkuptuese” me të tilla projekte!
