Zgjedhjet lokale kanë një veçori që i bën ato të ndryshme nga zgjedhjet e përgjithshme: në to ka gjithmonë një arsye për të gjitha palët në garë për të shpallur fitoren. Fitore është qoftë dhe marrja e një njësie vendore në qeverisje, fitore është dhe marrja e një numri të caktuar votuesish. Ka shumë “plaçkë” për t’u ndarë dhe çdo pjesë e saj duket se meriton duartrokitje fitimtari.
Në zgjedhjet e vitit 2007, për shembull, kur PD humbi të gjitha qytetet kryesore të vendit, ish-kryeministri shpiku termin: Shqipëria blu sepse partia e tij kishte marrë shumë vota për këshillat bashkiakë.
Në 2011 brohoriti për Tiranën që e rrëmbeu në tavolinë, me KQZ e Kolegj Zgjedhor, por duke humbur sërish në të gjitha qytetet e rëndësishëm të vendit. Nuk bënë ndryshim as zgjedhjet lokale të këtioj viti. Sipas traditës, dje edhe pasardhësi i tij Basha deklaroi fitoren e PD-së në zgjedhje. Në një këndvështrim të caktuar ka të drejtë. Pavarësisht se 21 qershori mund të quhet shkalla më e ulët e përfaqësimit politik të PD-së në tortën elektorale të vendit. Ndërkohë që fitimtarë të humbur apo humbës që triumfojnë, mund të jenë të gjithë në të njëjtën kohë. Varet nga këndvështrimi. Varet nga mënyra që zgjedh gjithkush për të ndarë fitoren nga humbja.
