Nga Shqipe Gjocaj/
Donjeta Kasumi (aka Kallashi) është produkt i një realiteti injorant dhe të dhunshëm. Ajo, bashkë me shoqet e veta, shfrytëzohen dhe keqpërdoren në klubin e natës Kobra City, një vend ku një grup burrash depresiv dhe pa dinjitet nxjerrin kënaqësi duke i parë vajzat dhe gratë duke “vallëzuar”.
Pavarësisht se ajo e ka zgjedhur vetë “profesionin” e saj si argëtuese e burrave të tillë, harrohet se ajo me gjasë është e rrezikuar nga pronarët e lokalit, por edhe nga vizitorët e tij, sepse nuk konsiderohet si asgjë tjetër përveçse si “copë mishi”. Për më tepër, Kallashi nuk është me e vjetër se 22 vjeç dhe duket sikur është në të tridhjetat. Kjo tregon se sa shumë mund të jetë duke e shijuar ajo profesionin të cilin e ka zgjedhur “vetë”.
Është e çuditshme se si për mediat tona, arrestimi i fundit Kallashit përbën fokus të një lajmi, por jo edhe fakti se është bastisur një lokal nate ku janë gjetur armë dhe drogë. Bëhet fjalë për një lokal i cili, siç na bën të besojnë edhe bastisja e policisë, me gjasë menaxhohet nga njerëz të dhunshëm dhe i cili bën para dhe emër nga shfrytëzimi i grave.
Me sa duket për këtë shoqëri është më e lehtë që të merret me Kallashin dhe me “asetet e saja”, sesa me kriminelët e dyshuar të lokalit, apo me ata zyrtarë institucionesh që janë të lidhur me krimin, në mesin e të cilëve, ashtu si në rastin e Suharekës, shpesh po na qëllojnë pikërisht njerëzit që më së shumti po na predikojnë moral. Kurse juve analistëve e gazetarëve të tjerë të shquar, nuk ju bën aspak më të mirë e gjithë kjo simbolikë misogjene të cilën po e përdorni gjatë talljes me lajmin dhe me ngjarjen. Trajtimi që po i bëni çështjes është treguesi më i mirë i mishërimit tuaj me mjedisin seksist dhe shtypës ndaj grave.
