Sekretari amerikan i Mbrojtjes, Ashton Carter, njoftoi se ushtarakët amerikanë mund të marrin sërish pjesë në Irak në operacione tokësore kundër grupit Shteti Islamik, të ngjashme me ato të së enjtes, që i morën jetën një ushtari amerikan.
“Pres që të zhvillojmë më shumë operacione të këtij lloji”, deklaroi ai gjatë një konference për shtyp në Pentagon. “Këto operacione mundësuan shpëtimin e jetëve të 70 të burgosurve, dhe mbledhjen e informacioneve të rëndësishme”, theksoi ai. Të enjten forcat speciale amerikane morën pjesë në bashkëpunim me forcat kurde në një sulm kundër një burgu të grupit Shteti Islamik në veri të Irakut.
