Kongresi amerikan ka kërkuar nga Pentagoni analizën e bashkëpunimit të sigurisë të secilit vend të Ballkanit Perëndimor me Rusinë, transmeton Koha.net.
Vëmendje e veçantë në këtë analizë, thotë “Novosti” i Beogradit , do t’i kushtohet Serbisë pasi ajo nuk është anëtare e NATO-s e bashkëpunimi i saj ushtarak me Moskën po bëhet gjithnjë e më i fuqishëm. Pos analizës për Serbinë, shefit të Pentagonit James Mattis i është kërkuar të përgatisë raportet edhe për Bosnjë e Hercegovinën, Kosovën e Maqedoninë.
Në këto raporte duhet të gjendet edhe regjistri detajues i armatimit rus, pajisjeve dhe teknologjisë ushtarake me vlerë më shumë se 1 milion dollarë që këto vende i kanë blerë që nga viti 2012 deri më sot. Serbia sivjet nga Rusia i ka marrë gjashtë avionë Mig- 29.
Po ashtu kërkohet që të bëhet përshkrim i i pjesëmarrjes së forcave të sigurisë të secilit vend në ushtrimet ushtarake të Rusisë që nga vitit 2012 si dhe përshkrim i të gjitha marrëveshjeve ushtarake me Rusinë si dhe pasqyra e bashkëpunimit informativ me Moskën.
Qëllimi i kësaj kërkese është që Amerika ta ketë pasqyrën se sa ndikon bashkëpunim i Ballkanit Perëndimor me Rusinë në sigurinë e interesave të Amerikës, NATO-s, vendeve të Ballkanit Perëndimor dhe të çdo anëtari të NATO-s që kufizohet me ndonjërin nga vendet e këtij rajoni. (b.an)
