Komisioni për Çështjet Ligjore ka miratuar projekligjin, i cili u njeh vitet e punës që s’figurojnë në regjistra të gjithë pensionistëve që kanë punuar në ish-kooperativa.
Ky projektligj mundëson që pensonistët nuk do të kenë më nevojë të përplasen dyerve të gjykatave me qëllim për të njohur vitet e punës.
“Projektligji synon rregullimin e efekteve të mbartura, si rezultat i problematikeve të krijuara ndër vite në lidhje me njohjen e viteve të punës për personat që u lind e drejta për pension në rastet kur ka mungesë të plotë të të dhënave, mungesë të pjesshme ose të gjitha të korrigjuara, të fshira, identitete të pasakta, fletë të dëmtuara, mungesë dokumentacioni apo probleme të këtij lloji për subjekte të caktuara”, shpjegoi zv.ministrja Olta Manjani.
Ajo theksoi se “ky projektligj do të mundësonte njohjen e periudhave të sigurimit pa pengesa procedurale, siç ndodh kur dokumentacioni që pasqyron vjetërsinë në punë paraqet mangësi që e bën të pamundur njohjen e saj administrativisht, pa shpenzime për përfituesit, por mbi të gjitha përfitimin e një pensioni për të paktën sa masa e pensionit social”, deklaroi zv.ministrja.
Projekligji “Për njohjen e periudhave të punësimit në institucionet shtetërore, në ish-ndërmarrjet shtetërore, në ish-ndërmarrjet bujqësore dhe në ish-kooperativat bujqësore për efekt pensioni në sistemin e 6 sigurimeve shoqërore”, kaloi në Komision me 15 vota pro.
Olta Manjani, zv.ministre e Financave: Projektligji për njohjen e periudhave të punësimit në institucionet shtetërore në ish ndërmarrjet shtetërore, ish-ndërmarrjet bujqësore dhe ish-kooperativat bujqësore për efekt pensioni në sistemimin e sigurimeve shoqërore.
Ky projektligj ka një rëndësi të veçantë për një numër të madh qytetarësh shqiptarë që kanë punuar përpara vitit 1994 dhe nuk kanë mundur të dokumentojnë periudhat e tyre të punës për efekt të llogaritjes së sigurimeve shoqërore.
Projektligji ka për qëllim njohjen si periudhë sigurimi për efekt pensioni në sistemin e sigurimeve shoqërore të periudha të punësimit nga mosha 18 vjeç, apo nga data e mbarimit të shkollës së lartë në institucionet dhe ish-ndërmarrjet shtetërore deri më datën e hyrjes në fuqi të ligjit vitit 1993, në ish-ndërmarrjet bujqësore deri më datën në fuqi të VKMs-së 452, datë 17.10.1992 për ristrukturimin e ndërmarrjeve bujqësore, i ndryshuar dhe në ish-kooperativat bujqësore deri më datë 19.07.1991.
Me qëllim njohjen e vjetërsisë në punë, për efekt të llogaritjes së masës së pensionit të pleqërisë, është konstatuar se shumë prej punonjësve të ish-ndërmarrjeve shtetërore, ish-ndërmarrjeve bujqësore dhe ish-kooperativat, nuk arrijnë të provojnë dhe dokumentojnë të gjitha periudhat e vjetërsisë së punës përpara 1994.
Në shumë raste kërkuesit nuk kanë pasur periudha kontributive pas 1994, nuk plotësohej kushti minimal i periudhës së sigurimit pra 15 vite gjë që ka detyruar shumë qytetarë ti drejtohen gjykatave me kërkesa padi për njohjen e periudhave të padokumentuara para 1994.
Ky proces zgjat në kohë ka shpenzime të mëdha dhe shpesh të papërballueshme për qytetarët, por edhe për administratën publike.
Projektligji synon rregullimin e efekteve të mbartura, si rezultat i problematikeve të krijuara ndër vite në lidhje me njohjen e viteve të punës për personat që u lind e drejta për pension në rastet kur ka mungesë të plotë të të dhënave, mungesë të pjesshme ose të gjitha të korrigjuara, të fshira, identitete të pasakta, fletë të dëmtuara, mungesë dokumentacioni apo probleme të këtij lloji për subjekte të caktuara.
Miratimi i këtij projektligji do të mundësonte njohjen e periudhave të sigurimit pa pengesa procedurale, siç ndodh kur dokumentacioni që pasqyron vjetërsinë në punë, paraqet mangësi që e bën të pamundur njohjen e saj administrativisht, pa shpenzime për përfituesit, por mbi të gjitha përfitimin e një pensioni për të paktën sa masa e pensionit social.
